Сергели метро линиясида дастлабки рельсларни ўрнатиш ишлари бошланди. Бу ҳақда «Ўзбекистон темир йўллари» матбуот хизмати хабар берди.
«Белгиланган лойиҳага асосан Сергели йўналишининг умумий узунлиги 6,94 километр бўлиб, ‘Чоштепа’, ‘Тошкент ҳалқа йўли’, ‘Сергели’, ‘Афросиёб’, ‘Қипчоқ’ ва ‘Чинор’ бекатларидан иборат», — дейди «Тошкент метрополитени» унитар корхонасининг Тошкент метрополитени линияларини қуриш дирекцияси бошлиғи Сойибжон Жўраев.
Унинг айтишича, айни пайтда бекатлар ва уларнинг оралиғида белгиланган режа бўйича «Кўприкқурилиш трести» унитар корхонасининг тажрибали мутахассислари томонидан бунёдкорлик ишлари амалга оширилмоқда. Қурилиш ишларида 60 та замонавий техника ва механизмлардан фойдаланилмоқда, 700 дан ортиқ мутахассислар 2 сменада ишламоқда.
Ўтган вақт давомида барча 6 та бекатнинг 5 таси ва уларнинг оралиғидаги таянч устунлар учун пойдевор қуйиш ишлари Германия технологияси асосида бурғилаш услубида амалга оширилиб, эстакада таянч устунлари тўлиқ ўрнатиб чиқилди. Уларнинг орасига 26 метрлик балкалар монтаж қилинмоқда. Шунингдек, бекатларга эскалатор ўрнатиш учун пойдевор, ғишт териш, ташқи фасадни мармар билан қоплаш, электр ёритиш учун симлар ётқизиш ишлари ҳам якунига етмоқда. Йўловчи платформа тўсинларининг монтаж ишлари ҳамда металл конструкцияларни ўрнатиш ишлари давом этмоқда.
Тошкент метрополитени Сергели линиясининг «Чоштепа» бекати Чилонзор йўналишидаги «Олмазор» ерости бекати билан боғланади. Белгиланган лойиҳанинг ушбу мураккаб ечимини амалга оширишда қурувчи темир йўлчилар «Чилонзор» электродепоси ҳудудида чап ва ўнг таянч деворларини ўрнатиш бўйича 21 550 кубометр ҳажмдаги ер ишларини якунига етказди. Айни пайтга қадар бу ерда дастлабки рельслар ётқизиш ишлари бошлаб юборилди.
«Тошкент ҳалқа йўли» бекатидан «Сергели» бекатига қадар қарийб 600 метрга яқин рельслар ётқизилди. Ушбу йўналишнинг туннел қисми Тошкент метрополитенининг Чилонзор йўналишидаги «Олмазор» ерости бекатига уланди ва туннелни қайта кўмиш ишлари якунланиб, асфальт қопламаси тикланди. «Чоштепа» бекати янги линиянинг дастлабки эстакада шаклидаги бекати бўлади.
Ундан кейин эса «Тошкент ҳалқа йўли» бекати келади. Бу ерда ҳам таянч устунларга ҳамда эскалатор ўрнатиш учун пойдеворлар, ғишт териш, ташқи фасадни мармар билан қоплаш, электр ёритиш учун симлар ётқизиш ишлари якунланиб, ҳозирги кунда бекатнинг ички безак ишлари сўнгги босқичда амалга оширилмоқда. Бекат томининг металл конструкцияларини ўрнатиш ишлари якунланди. Бекатнинг платформа қисмини бетонлаш ишлари ҳам тўлиқ якунланиб, ички пардозлаш ишлари давом этмоқда. Перронларга мармар плиталар ётқизилмоқда.
«Сергели» бекатида эса пойдевор қуйиш учун қазиш, ғишт териш ва эскалатор пойдеворини қуйиш ишлари тўлиқ якунланган. Бекат металл томининг 770,6 метр квадрат қисмини ўрнатиш ишлари тамомланди. Ҳозирги кунда бекатнинг ички ва ташқи деворларини пардозлаш ишлари учун тайёр ҳолга келтирилган.
«Афросиёб» ва «Қипчоқ» бекатларида бино пойдеворларини қазиш ва бетон қуйиш, бекатларда ташқи ва ички оралиқ деворларига ғишт териш ишлари якунланиб, сувоқ ишлари 100 фоиз тугатилди.
Таълидланишича, барпо этилаётган барча ерусти метро бекатларида замонавий техникалардан, сифатли қурилиш материалларидан фойдаланилмоқда. Хусусан, имконияти чекланган йўловчилар учун ҳам бекатлар платформасида хавфсиз тактил плиткалар ётқизилиши ҳамда йўловчиларнинг платформаларга кўтарилиши учун замонавий лифт ва эскалатор, хавфсизликни таъминлаш мақсадида бекатларда замонавий видеокузатув ускуналари, IT русумдаги замонавий турникетлар ҳамда электр тежайдиган ёритиш чироқлари ўрнатилади. Мобил алоқа ускуналари ҳам электр қувватлагичлар билан жиҳозланади.
Аввалроқ Сергелини Тошкент маркази билан боғлайдиган янги йўл ва кўприк қурилиши хабар берилган эди.
Изоҳ (0)