Бухоро ИИБ Йўл ҳаракати хавфсизлиги бошқармаси томонидан ўтказилган тунги рейдда карантин қоидаларига зид ҳаракат қилиб, жамиятда юриш-туриш тартибини бузган аёллар гуруҳи аниқланди. Бу ҳақда «Дарё»га вилоят Йўл ҳаракати хавфсизлиги бошқармаси ахборот хизмати раҳбари Улуғбек Шукруллаев маълум қилди.
Тунги рейд давомида ЙПХ инспекторлари Cobalt русумли автотранспорт воситасини тўхтатганда автомашина салонида бўлган беш нафар аёл ИИБ ходимларига бўйсунмасдан, уларга фаол қаршилик кўрсатган. Аёл ҳайдовчидан спиртли ичимлик ҳиди анқиб турганига қарамасдан, у тиббий кўрикдан ўтишдан бош тортган. Ножўя хатти-ҳаракат қилиб, ИИБ ходимларини ҳақорат қилган.
Аёлларнинг фаол қаршилигига қарамасдан, ҳайдовчи тиббий кўрикдан ўтказилган. Натижада унинг маст ҳолатда экани аниқланган.
Ҳолат юзасидан аёл ҳайдовчига нисбатан Маъмурий жавобгарлик тўғрисидаги кодекснинг 131-моддаси (Транспорт воситаларини маст ҳолда бошқариш) асосида жавобгарлик қўлланилиб, транспорт воситаси вақтинчалик жарима майдончасига жойлаштирилган.
Шунингдек, Бухоро шаҳрида яшовчи 21 ёшли фуқаро Н.Ж. карантин қоидаларини бузиб, ноқонуний равишда йўловчи ташиш билан шуғулланган. У йўловчи А.Д.ни манзилига олиб кетаётган пайтида ЙПХ ходимлари томонидан тўхтатилган. Шунда ҳайдовчи йўловчи ташимаётганини, йўловчи сифатида кетаётган фуқаро ўзининг никоҳидаги қиз эканлигини айтиб ёлғон гапирган.
Ҳайдовчининг одам ташишга уриниши ўз исботини топгач, унга нисбатан Маъмурий жавобгарлик тўғрисидаги кодексга мувофиқ маъмурий баённома расмийлаштирилган ва транспорт воситаси вақтинчалик жарима майдончасига жойлаштирилган.
Бундан аввал эса Қашқадарёда маст ҳайдовчи бошқарувидаги фургон «заправка»дан орқаси билан чиқиб келаётганда пиёдани уриб юбориши оқибатида пиёда, Навоий вилоятида эса кўчада маст ҳолда ётган эркакни Nexia босиб кетиб, фуқаро вафот этгани ҳақида хабарлар берилганди.
Изоҳ (0)