Янги Зеландияда коронавирус билан касалланган охирги бемор тузалди, деб ёзмоқда «Korrespondent.net». Мамлакат соғлиқни сақлаш вазирлигининг 8 июнь куни берган хабарига кўра, Янги Зеландияда икки ҳафтадан ортиқ вақт давомида коронавирусга чалиниш бўйича янги ҳолатлар қайд этилмади.
Вазирлик хабарида айтилишича, коронавирусга чалиниб, Окленддаги касалхонада шифокорлар назоратида бўлиб турган бемор ўтган якшанба куни бутунлай соғайган деб топилган.
Янги Зеландия бош санитар шифокорининг таъкидлашича, мамлакатда 28 февралдан буён илк бор коронавирусга чалинган беморлар қолмади. Сўнгги марта касалланиш ҳолати 22 май куни қайд этилган.
Пандемия бошланганидан буён Янги Зеландияда 1 504 киши касалликка чалинган, улардан 1 482 нафари тузалган, 22 нафари вафот этган. Мамлакатда коронавирусни аниқлаш бўйича 295 мингта тест ўтказилган.
Эпидемиологик вазият яхшиланиши билан Янги Зеландияда карантин чекловларининг аксарияти бекор қилинган. Мамлакат Вазирлар Маҳкамаси 8 июнь куни таҳдид даражаси пасайганини эълон қилиб, чегарадан ташқари барча карантин чекловларини бекор қилиши кутилмоқда.
Аввалроқ Ухандаги касалхоналарда коронавирусга чалинган беморлар қолмагани хабар берилганди.
Изоҳ (0)