Yangi Zelandiyada koronavirus bilan kasallangan oxirgi bemor tuzaldi, deb yozmoqda “Korrespondent.net”. Mamlakat sog‘liqni saqlash vazirligining 8-iyun kuni bergan xabariga ko‘ra, Yangi Zelandiyada ikki haftadan ortiq vaqt davomida koronavirusga chalinish bo‘yicha yangi holatlar qayd etilmadi.
Vazirlik xabarida aytilishicha, koronavirusga chalinib, Oklenddagi kasalxonada shifokorlar nazoratida bo‘lib turgan bemor o‘tgan yakshanba kuni butunlay sog‘aygan deb topilgan.
Yangi Zelandiya bosh sanitar shifokorining ta’kidlashicha, mamlakatda 28-fevraldan buyon ilk bor koronavirusga chalingan bemorlar qolmadi. So‘nggi marta kasallanish holati 22-may kuni qayd etilgan.
Pandemiya boshlanganidan buyon Yangi Zelandiyada 1 504 kishi kasallikka chalingan, ulardan 1 482 nafari tuzalgan, 22 nafari vafot etgan. Mamlakatda koronavirusni aniqlash bo‘yicha 295 mingta test o‘tkazilgan.
Epidemiologik vaziyat yaxshilanishi bilan Yangi Zelandiyada karantin cheklovlarining aksariyati bekor qilingan. Mamlakat Vazirlar Mahkamasi 8-iyun kuni tahdid darajasi pasayganini e’lon qilib, chegaradan tashqari barcha karantin cheklovlarini bekor qilishi kutilmoqda.
Avvalroq Uxandagi kasalxonalarda koronavirusga chalingan bemorlar qolmagani xabar berilgandi.
Izoh (0)