Ўзбекистон Президенти Шавкат Мирзиёев ҳузурида 8 июнь, душанба куни ахборот технологиялари ва рақамли иқтисодиётни ривожлантириш борасидаги ислоҳотлар ижроси бўйича тақдимот ўтказилди. Бу ҳақда Президент матбуот хизмати хабар берди.
Йиғилишда соҳадаги мақсадларга замонавий дастурчилар тайёрлашни жадаллаштириш орқали эришиш мумкинлиги қайд этилди. Таъкидланишича, «Бир миллион дастурчи» лойиҳасининг дастлабки босқичида 62 мингдан зиёд ўқувчи қамраб олиниб, уларнинг 5400 нафарига малака сертификати берилди.
2020 йил якунига қадар 100 минг нафар ва 2021 йилнинг биринчи ярмида яна 150 минг нафар ўқувчини ўқитиш, талабаларнинг дастурий таъминот бўйича малакасини ошириш вазифаси белгиланди. 5-синфдан ўқитиб келинаётган информатика фанини замонавий технологиялардан келиб чиқиб такомиллаштириш, ушбу фанга «Бир миллион дастурчи» лойиҳасига доир йўналишларни киритиш бўйича кўрсатмалар берилди.
Эслатиб ўтамиз, Президенти Шавкат Мирзиёев 2020 йилнинг 11 май куни рақамли иқтисодиёт ва электрон ҳукуматни кенг жорий этиш масалалари бўйича ўтказган йиғилишда Ўзбекистон мактабларида 7-синфдан бошлаб дастурлаш асосларини ўқитишни йўлга қўйиш бўйича кўрсатма берганди. Ўша йиғилишда келгуси ўқув йилида «Бир миллион дастурчи» лойиҳасига 47 минг нафар ўқувчини қамраб олиш ҳақида сўз борганди.
Маълумот учун, 2019 йилнинг 21 ноябрида Ўзбекистонда дастурчиларни бепул тайёрловчи One Million Uzbek Coders лойиҳаси ишга туширилганди. Лойиҳа биринчи навбатда маҳаллий аҳолига, асосан, ёшларга ахборот технологиялари мутахассисликларида арзон ва сифатли таълим олиш имкониятини беради. Лойиҳа Бирлашган Араб Амирликлари ҳукумати, Ўзбекистон Ахборот технологиялари ва коммуникацияларини ривожлантириш вазирлиги, Тошкент шаҳридаги Инҳа университети ва IT-Park қошидаги IT-академия кўмагида амалга оширилмоқда.
Изоҳ (0)