Фарғона вилояти Сўх тумани Чашма қишлоғида 31 май куни юз берган можарода учта уй ёниб кетгани ҳақида хабар берилганди. Туман ҳокимлиги томонидан маълум қилинишича, мазкур уйларнинг эгалари вақтинчалик турар жойларга жойлаштирилган.
Хабар берилишича, уйлари ёниб кетган Исроилжон, Анваржон ва Ўлмасой Бекназаровларнинг уй-жойлари ҳақиқатан ҳам ёниб кетган. Можаро оқибатида уй-жойсиз қолган мазкур фуқароларга давлат томонидан ёрдам кўрсатилди.
Қайд этилишича, вақтинчалик уй-жой билан таъминланган фуқароларга туман ҳокимлиги томонидан зарурий шарт-шароитлар яратиб берилди. Оила ўзининг ошхонасига эга, шунингдек, нон ёпиш учун тандир ҳам қуриб берилди.
Шу билан бирга, туман ҳокимлиги томонидан бошпанасиз қолган Бекназаровлар оиласининг барча 11 нафар аъзоси учун янги кийим-кечаклар ҳам харид қилинган. Таъкидланишича, бу оилаларнинг уйлари замонавий тарзда давлат томонидан қуриб берилади.
Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.
Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбой Жээнбеков билан телефон орқали мулоқот қилди.
Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди. Сўх туманига янги ҳоким ва ички ишлар бўлимига янги раҳбар тайинланди.
Изоҳ (0)