Карантин чекловлари шароитида Ўзбекистоннинг бир вилоятида яшовчи фуқаро йўлланма асосида шахсий автомобилда бошқа вилоятдаги санаторийга бориши мумкин. Бу ҳақда Санитария-эпидемиология назорати давлат инспекцияси бошлиғи Нурмат Отабеков 8 июнь, душанба куни бўлиб ўтган брифингда маълум қилди.
Нурмат Отабековга Фарғона водийсида яшовчи фуқаро Зомин санаторийсига йўлланма асосида шахсий машинада бориш мумкин ёки йўқлиги масаласида савол берди.
Маълум қилинишича, агар йўлланмада паспорт маълумотлари, «Зомин» санаторийсида даволаниш учун шифокор томонидан берилган санатор-курорт картаси ҳамда 3 кун олдин коронавирусга топширилган тест натижалари кўрсатмалари бўлса, бемалол у ерга бориш мумкин.
Эслатиб ўтамиз, Ўзбекистонда 1 июндан бошлаб «яшил» ҳудудларда, 5 июндан эса «сариқ» ҳудудларда меҳмонхоналар, санаторийлар, пансионатлар, болалар оромгоҳлари, меҳмон уйлари, пляжлар, бошқа дам олиш масканлари ва жойлаштириш воситалари фаолиятига рухсат берилди. Шунингдек, фуқароларни дам олиш масканларига марказлашган ҳолда олиб бориш учун вилоятлараро автобус қатнови ҳам йўлга қўйилди. Бундан ташқари, 1 июндан бошлаб мамлакатнинг «сариқ» ва «яшил» ҳудудларига ички туризмга рухсат этилди.
Изоҳ (0)