Ўзбекистон Санитария-эпидемиология назорати давлат инспекцияси бошлиғи Нурмат Отабеков коронавирусдан тузалган беморларда касалликдан кейин қандай белгилар кузатилиши ҳақида маълумот берди.
Нурмат Отабековнинг маълум қилишича, даволанган одамлар учун коронавируснинг оқибатлари бир нечта омилга боғлиқ. Улар инсоннинг иммунитети ва сурункали касалликлар ҳисобланади.
Қайд этилишича, беморлар соғайгандан кейин бир неча ҳафта давомида тез юрганда, зинапояга чиқишда ёки жисмоний зўриққанда нафас қисилиши, иситмасиз ва балғамсиз йўтал, сурункали касалликларнинг кучайиши каби асоратлар кузатилиши мумкин.
Инспекция раҳбарининг билдиришича, мазкур асоратларга қарши курашиш учун даволангандан сўнг иммунитетни кучайтиришга, витаминларга бой озиқ-овқат маҳсулотларини истеъмол қилишга, кунда бир неча бор нафас гимнастикасини бажаришга ва хоналарни доим шамоллатиб туришга аҳамият бериш керак.
Ўзбекистонда коронавирус инфекциясини юқтириб олганлар сони 8 июнь соат 17:00 ҳолатига кўра, 52 нафарга кўпайди ва касалликни юқтириб олганларнинг умумий сони 4404 нафарга етди. 8 июнь давомида коронавирусга чалинган фуқаролардан 3 нафари тузалиб, жами соғайганлар сони 3357 нафарга етди. Ҳозирда шифохоналарда 1030 нафар беморга шифокорлар томонидан белгиланган стандартлар бўйича даво чоралари кўрилмоқда. Мамлакатда пандемия бошидан буён 18 нафар бемор касаллик асоратлари оқибатида вафот этган.
Изоҳ (0)