Қорақалпоғистонда браконьерлар томонидан табиатга 38,4 миллион сўм зарар етказилгани аниқланди. Бу ҳақда Қорақалпоғистон Экология қўмитасининг ахборот хизмати «Дарё»га маълум қилди.
Давлат экология қўмитаси ташаббуси билан Давлат экология қўмитаси тизимида 2020 йилнинг май ойи «Браконьерликка қарши кураш ойи» деб эълон қилинган. Қўмита Қорақалпоғистон ва Хоразм вилояти сув ҳавзаларида 25 апрелдан 10 июнга қадар балиқларнинг увулдириқ ташлаши, кўпайиши мақсадида балиқларни ов қилишни тақиқлаган эди.
Биохилма-хиллик ва муҳофаза этиладиган табиий ҳудудлар масалалари бўлимининг тезкор гуруҳ аъзолари томонидан ўтказилган рейд табдирида Қорақалпоғистоннинг Тахтакўпир туман ҳудудидаги Жанақазған коллектори атрофидаги табиий кўлларда 4 нафар фуқаро ноқонуний равишда балиқ овлаётгани аниқланган. Браконьерлар ёнидан 74 дона зоғoрабалиқ, 1 дона оқ сла, 1 дона товонбалиқ, 1 дона оққайроқ балиқ топилган.
Браконьерлар томонидан табиатга 38,4 миллион сўм зарар етказилгани ҳисоблаб чиқилган. Ҳолат бўйича барча ҳужжатлар расмийлаштирилиб тергов, суриштирув ишларини олиб бориш учун Қорақалпоғистон Республикаси Орол табиатни муҳофаза қилиш прокуратурасига юборилган.
Изоҳ (0)