Андижон вилоятининг Избоскан туманида 20 минг аҳолига хизмат қилувчи 73 метр узунликдаги янги кўприк фойдаланишга топширилди. Бу ҳақда хабар берган «Дарё» мухбирининг айтишича, мазкур кўприк 50 йил аввал сел ювиб кетиши оқибатида яроқсиз ҳолга келган.
Таъкидланишича, мазкур кўприк «Анорзор» ва «Бештарак» маҳаллаларини боғлаб турган.
«Анорзор» маҳалла фуқаролар йиғини раиси Ўғилхон Ҳайитованинг айтишича, осма темир кўприкнинг яроқсизлиги боис сел тошқинлари пайтида аҳолини хавфсиз ҳудудларга кўчириш борасида бир қанча муаммолар юзага келган.
«Маҳалла нуронийлари 2019 йил вилоят ҳокими Шуҳрат Абдураҳмоновга мурожаат қилиб, мазкур масалада кўмак сўрашганди. Шундан сўнг ўтган йилнинг ёз ойларида автомобиллар ва пиёдалар фойдаланадиган янги кўприк қурилиши бошлаб юборилганди», — дейди МФЙ раиси.
Маълумот берилишича, Тентаксой устидан ўтувчи мазкур кўприкнинг узунлиги 73 метр, эни эса 10 метр бўлиб, кўприк қурилиши учун 6 миллиард 734 миллион сўм маблағ сарфланган.
Кўприк қурилиши натижасида Пахтаободдан Андижон шаҳригача бўлган масофа 15 километрга қисқарган.
«Сел тошқинларига яроқли кўпригимиз бўлишини орзу қилардик. Биздан олдин ота-боболаримиз ҳам ҳаракат қилишган, лекин натижа бўлмаган. Кўп йиллик югур-югурлардан сўнг янги кўприкка эга бўлдик. Энди бу кўприкдан нафақат анорзорликлар балки, ‘Гуркиров’, ‘Бештарак’, Пахтаобод туманининг ‘Хайробод’ ва ‘Шувоқзор’ маҳаллаларида яшовчи 20 минг аҳоли ҳам бемалол фойдаланиши мумкин», — дейди Ҳусанбой ота Орифжонов.
Мавзуга доир:
Изоҳ (0)