Ўзбекистон бизнес-омбудсмани Давлат солиқ қўмитасини огоҳлантирди. Бу ҳақда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил сайтида маълум қилинган.
Бунга таҳлиллар натижасида 4 208 нафар тадбиркорларга бугунги кунга қадар тўланмаган 145,5 миллиард сўм асосий қарздорлик ва ушбу қарздорликка нисбатан 3,7 миллиард сўм қийматидаги пенялар ҳисоблангани аниқлангани сабаб бўлган.
Аввал хабар берилганидек, Президент фармони билан коронавирус пандемияси шароитида тадбиркорлик субъектларига тадбиркорлик субъектларига қатор имтиёз ва енгилликлар берилган. Хусусан, мазкур ҳуқуқий ҳужжатларга кўра, тадбиркорлик субъектларига нисбатан фойдаланилмаётган ишлаб чиқариш майдонлари, яшаш учун мўлжалланмаган иншоотлар, шу жумладан, 2020 йил 1 апрелга қадар аниқланганларга нисбатан мол-мулк солиғи ва ер солиғининг оширилган ставкаларини қўллаш, шунингдек, кўрсатилган солиқлар бўйича оширилган ставкаларни қўллаш натижасида юзага келган қарздорликка нисбатан пеня ҳисоблаш ва мажбурий ундириш чораларини кўриш тартиби 2020 йил 1 апрелдан 31 декабрга қадар тўхтатилиши белгиланганди.
Натижада Давлат солиқ қўмитаси билан ҳамкорликда таъсирчан солиқ қўллаш натижасида тадбиркорларнинг банк ҳисобварақаларига қўйилган инкассо топшириқномалари чақиртириб олинган ҳамда мазкур турда чиқарилган суд қарорлари ижросини 2020 йил 31 декабрга қадар тўхтатиш тўғрисида судларга илтимосномалар киритилган.
Мазкур ҳолат бўйича ДСҚнинг маълум қилишича, оширилган ставкаларни қўллаш, пеня ҳисоблаш ва мажбурий ундириш каби таъсирчан чораларни тўхтатиш ДСҚ томонидан тегишли дастурий маҳсулотга ўзгартириш киритиш орқали автоматик тарзда амалга оширилади. Бу эса имтиёзларни қўллаш шаффофлик ва адолат тамойиллари асосида амалга оширилишини таъминлайди.
Таъсирчан солиқ қўллаш натижасида юзага келган 145,5 миллиард сўм миқдоридаги солиқ қарзи бўйича 4 208 та тадбиркорлик субъектининг банк ҳисобварақаларида ижрода турган инкассо топшириқномалари огоҳлантиришга қадар ДСҚ томонидан марказлашган ҳолда чақиртириб олинган.
Хабарда келтирилган 3,7 миллиард сўм миқдоридаги пеня эса фармон қабул қилингунга қадар ҳисобланган бўлиб, солиқ хизмати органлари томонидан мазкур суммани ундириш чоралари тўлиқ тўхтатилган.
Ҳудудий солиқ органлари томонидан мазкур солиқ туридан мавжуд қарздорликлар бўйича ижро органлари иш юритувида бўлган 14,1 миллиард сўмлик 251 та суд ҳужжати ижросини 2020 йил 31 декабрга қадар тўхтатиш тўғрисида судларга илтимосномалар киритилиши таъминланган.
Изоҳ (0)