Ўзбекистон Cotton Campaign’ни 2020 йилги пахта терими мониторингига таклиф қилди

Ўзбекистон томони 2020 йилги пахта йиғим-терими кампаниясини мониторинг қилишда Cotton Campaign’ни бевосита ҳамкорликка чақирди. Бу ҳақда Бандлик ва меҳнат муносабатлари вазирлиги маълум қилди.

Таъкидланишича, халқаро ташкилотлар, тўқимачилик бозори ва бизнеснинг кўмагисиз тўқимачиликни иш ўринлари ташкил этиш муаммосини ҳал қилишда мамлакатдаги етакчи бўлган тармоққа айлантириб, жадал ривожлантириб бўлмайди.

«Шу боис 2020 йилда инспекторлар ва уларнинг ёрдамчилари, иш берувчилар, ҳокимлар, фермерлар, фермер хўжаликлари ва пахта-тўқимачилик кластерлари вакиллари учун Халқаро меҳнат ташкилотининг миллий ва халқаро экспертларини жалб қилган ҳолда мажбурий меҳнатга йўл қўймаслик бўйича тренинглар ўтказиш орқали жойларда ишларни кучайтириш режалаштирилмоқда», — дейилади вазирлик ахборотида.

Мажбурий меҳнатга жалб қилганлик учун жавобгарлик янада кучайтирилиши кутилмоқда, ушбу йўналишда судьялар, прокурорлар ва адвокатларнинг ўқувлари ташкил этилади. Меҳнат шартномасини тўғри расмийлаштириш тўғрисида тушунтиришлар берилади, қишлоқ хўжалигига ихтисослашган компаниялар томонидан ишчиларни жалб қилиш бўйича бандликка кўмаклашиш ҳудудий марказларининг имкониятларини кучайтириш чоралари кўрилади.

Бандлик ва меҳнат муносабатлари вазирлиги вакилларининг алоҳида қайд этишича, мажбурий меҳнатнинг ҳар қандай шакли Ўзбекистонда пахта ва тўқимачилик саноатининг ривожланиши учун жиддий салбий оқибатларга олиб келади, мамлакатнинг обрўсига путур етказади.

«Охирги тўрт йил ичида пахта терими мавсумида мажбурий меҳнатга жалб қилиш ҳолатлари тўрт баробарга — 2015 йилдаги 448 минг кишидан 2019 йилдаги 102 минг кишигача камайди. Ҳукумат Ўзбекистонда муносиб меҳнат шароитларини таъминлаш бўйича изчил сиёсат олиб бормоқда», — дейди бандлик ва меҳнат муносабатлари вазирининг биринчи ўринбосари Эркин Муҳиддинов.