Kanada koronavirusga qarshi kurashda O‘zbekistonni qo‘llab-quvvatlash uchun 250 ming Kanada dollari ajratdi. Bu haqda O‘zbekiston Tashqi ishlar vazirligi ma’lum qildi.
Xabar berilishicha, 2020-yil 4-iyun kuni O‘zbekiston tashqi ishlar vaziri Abdulaziz Komilov va Kanada tashqi ishlar vaziri Fransua-Filipp Shampan o‘rtasida telefon orqali suhbat bo‘lib o‘tdi.
Muloqot chog‘ida tashqi siyosat idoralari rahbarlari tomonidan savdo-iqtisodiy va investitsion hamkorlikni rivojlantirish masalalariga alohida e’tibor qaratildi. Kanada biznesining O‘zbekiston bozoriga faol kirishi va qayta tiklanadigan energiya, sanoat va qishloq xo‘jaligi sohalarida yuqori texnologiyali investitsiya loyihalarini amalga oshirishdan manfaatdorlik izhor etildi.
Ikki mamlakat o‘rtasidagi aloqalarning ajralmas tarkibiy qismi xalqaro tashkilotlar doirasidagi hamkorlik ekani ta’kidlandi. Tomonlar BMT va uning ixtisoslashgan institutlari doirasidagi hamkorlikni kengaytirishga kelishib oldi.
Fransua-Filipp Shampan O‘zbekistonning Markaziy Osiyodagi roli va o‘rnini qayd etar ekan, mamlakatning xalqaro maydondagi tashabbuslarini amalga oshirishda har tomonlama qo‘llab-quvvatlashga tayyorligini bildirdi.
Shuningdek, vazirlar Afg‘oniston masalalari yuzasidan fikr almashdi. Tomonlar Afg‘onistondagi vaziyatni tinch yo‘nalishga tezroq o‘tishi, mamlakatni Markaziy Osiyodagi savdo-iqtisodiy va infratuzilma jarayonlariga jalb qilish zarurligini ta’kidladi.
Suhbat chog‘ida COVID-19 tarqalishi bilan bog‘liq dunyodagi mavjud vaziyat ko‘rib chiqildi. Pandemiyaning salbiy ta’sirini kamaytirish uchun birgalikda harakat qilish muhimligi qayd etildi. Shu o‘rinda Kanada TIV rahbari O‘zbekistonda koronavirus infeksiyasiga qarshi kurash uchun 250 ming Kanada dollari ajratilishini ma’lum qildi.
BMT Taraqqiyot dasturining O‘zbekistondagi vakolatxonasi tomonidan “Daryo”ga ma’lum qilinishicha, mazkur mablag‘ Kanadaning Mahalliy tashabbuslarni qo‘llab-quvvatlash jamg‘armasi tomonidan ajratilgan va O‘zbekistonning ikki mintaqasi — Sirdaryo va Qoraqalpog‘istonda iqtisodiy imkoniyatlarni va toza suvdan foydalanish sharoitlarini yaxshilashga qaratilgan.
Taklif etilayotgan moliyaviy yordam Sirdaryo viloyatida ayollar rahbarligidagi qishloq uy xo‘jaliklarining a’zolari uchun ish bilan ta’minlash imkoniyatlarini kengaytirish hamda Qoraqalpog‘istonda toza suvdan va xavfsiz dezinfeksiya vositalaridan foydalanish imkoniyatlarini yaxshilash orqali O‘zbekistonning qishloq hududlarida COVID-19 pandemiyasiga chidamlilikni oshirishga ko‘mak beradi.
Ushbu moliyalashtirish boshqa donorlardan olinayotgan mablag‘lar bilan birgalikda O‘zbekistonda COVID-19 pandemiyasi oqibatlarini bartaraf etish maqsadida yaratilgan BMT Taraqqiyot dasturining Tezkor javob choralari mexanizmi tomonidan ishlatiladi.
Avvalroq Yaponiya hukumati BMT Taraqqiyot dasturining O‘zbekistondagi COVID-19 pandemiyasi ijtimoiy-iqtisodiy oqibatlarini bartaraf etishdagi faoliyatini kengaytirish uchun 1,9 million dollar ajratishi haqida xabar berilgandi.
Izoh (0)