Yaponiya hukumati BMT Taraqqiyot dasturining O‘zbekistondagi COVID-19 pandemiyasi ijtimoiy-iqtisodiy oqibatlarini bartaraf etishdagi faoliyatini kengaytirish uchun 1,9 million dollar ajratadi. Bu haqda BMT Taraqqiyot dasturi matbuot xizmatiga tayanib, “Gazeta.uz” xabar berdi.

“Mazkur mablag‘lar katalizator bo‘ladi va O‘zbekistonda COVID-19 oqibatlarini yumshatish, shuningdek, barqaror va har tomonlama rivojlanish uchun sharoit yaratishga yo‘naltiriladi”, — deyiladi xabarda.

Birlashgan Millatlar Tashkiloti Taraqqiyot dasturining mamlakatdagi faoliyati, asosan, ijtimoiy-iqtisodiy qiyinchiliklarni boshidan kechirayotgan va alohida e’tibor talab qiladigan guruhlarga qaratilgan. Bular qatoriga ayollar, norasmiy sektordagi yoshlar, ishsizlar, xorijdan qaytayotgan muhojirlar, mavjud mikro, kichik va o‘rta korxonalar hamda startaplar kiradi.

BMT Taraqqiyot dasturi O‘zbekiston hukumati tomonidan Mahalla va oilani qo‘llab-quvvatlash vazirligining 9600 ta filialini elektron hujjat aylanish tizimiga o‘tkazish bo‘yicha sa’y-harakatlarini qo‘llab-quvvatlaydi.

Shuningdek, Yaponiya tomonidan moliyalashtiriladigan mablag‘lar har yili mamlakatda BMT Taraqqiyot dasturi tomonidan o‘tkaziladigan startap tanlovini o‘tkazish uchun ham ishlatiladi. Uning doirasida 40 nafar yigit-qiz ijtimoiy innovatsiyalar sohasidagi g‘oyalarini amalga oshirish uchun mablag‘ oladi.

Shuningdek, 990 ta kichik va o‘rta korxona uchun onlayn konsalting xizmatlarini ko‘rsatish rejalashtirilgan. 30 ta kichik korxona va olis tumanlarning 240 dan ortiq fermerga xizmat ko‘rsatuvchi 6 ta kooperativ moliyaviy yordam oladi.

Bundan tashqari, ayollarni ilm-fan, texnologiya, muhandislik va matematika (STEM) bilan shug‘ullanishga undovchi tashabbuslarni qo‘llab-quvvatlash uchun mablag‘lar ajratiladi.

Avvalroq Yaponiya O‘zbekistondagi qishloq ayollarining iqtisodiy huquqlari va imkoniyatlarini kengaytirish uchun 3 million dollar ajratishi ma’lum qilingandi.