Пайариқда ҳовлисида кўп миқдорда кўкнор етиштирган 54 ёшли фуқарога жиноят иши очилди

Самарқанд вилоят Пайариқ туманидаги Фармонқул қишлоғида яшовчи 54 ёшли эркак ҳовлисида кўп миқдорда кўкнор етиштиргани аниқланди ва унга нисбатан жиноят иши очилди. Бу ҳақда Ички ишлар вазирлиги ҳузуридаги Тергов департаменти хабар берди.

Маълум қилинишича, 2020 йилнинг 28 апрель куни соат 11:30 да Пайариқ тумани ИИБ ходимлари томонидан «Каттасайдов» МФЙ Фармонқул қишлоғида яшовчи 54 ёшли Р.Б.нинг уйидаги томорқаси кўздан кечирилган. Тадбир давомида томорқанинг 180 квадрат метр майдонида 3762 туп кўкнор гиёҳвандлик ўсимлиги, ётоқхонасидаги дераза токчасида гултувакка экилган 5 туп кўкнор борлиги аниқланган. Ушбу аниқланган ўсимликлар холислар иштирокида тегишли тартибда расмийлаштирилиб олинган.

Шунингдек, шу куни Р.Б.нинг ошхонаси кўздан кечирилганда, жавон устида ёйилган ҳолатда бўлган 11,7 грамм кўкнорнинг қуруқ ҳолдаги барглари борлиги аниқланиб, тегишли тартибда ҳужжатлаштирилиб олинган.

Бундан ташқари, Р.Б.нинг оғилхонасида симга илинган целлофан «пакет» ичида ва ертўласида елим баклашка ичида бўлган 519,5 грамм кўкнор уруғлари борлиги аниқланиб, ўрнатилган тартибда ҳужжатлаштирилиб олинган.

Мазкур ҳолат юзасидан Пайариқ тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 270-моддаси 1-қисми (Тақиқланган экинларни етиштириш) билан жиноят иши қўзғатилган. Жиноят иши бўйича Р.Б. гумон қилинувчи тариқасида жалб қилинган ва у билан бир қатор тергов ҳаракатлари олиб борилган.

Тергов ҳаракатлари натижасига кўра, Р.Б. Жиноят кодексининг 270-моддаси 1-қисми (Тақиқланган экинларни етиштириш), 276-моддаси 1-қисми (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) ва 25 орқали 273-моддаси 5-қисми (Гиёҳвандлик воситалари, уларнинг аналоглари ёки психотроп моддаларни кўп миқдорда қонунга хилоф равишда сотишга суиқасд) билан айбланувчи тариқасида жалб қилиниб, гаров эҳтиёт чораси қўлланилган.

Жиноят иши бўйича айблов хулосаси тузилиб, ўрнатилган тартибда тегишли судловга юборилган.