Франция президенти Эммануэль Макрон мамлакатда коронавирус пандемиясига қарши эълон қилинган турли чекловларнинг юмшатилиши — бахтли кунлар яқинлашиб қолганининг белгиси эканини таъкидлади. У бу ҳақда 2 июнь куни Twitter’даги саҳифасида пост қолдирган.
Макроннинг ёзишича 14 мартда Францияда «ўзини яккалаш» тартиби жорий қилинганидан шунча вақт ўтиб, энди мамлакатда илк бора меҳмонхоналар, кафелар ва ресторанлар қайта очила бошлаган. Унинг қайд этишича, ушбу ўзгаришлар бахтли кунлар яқин қолганидан дарак бермоқда.
«Франция халқининг қайта очилган ушбу масканларга бориши ва миллат руҳининг бир қисмига айланган ушбу ерларга ташриф буюришига шубҳа йўқ. Бу бизнинг маданиятимиз ва яшаш тарзимиз», — деган Макрон.
«Бундан ташқари, бу каби масканлар ҳукуматдан ҳам ёрдам сўраши мумкин – давлат ушбу секторга кўмак беришга тайёр», — дея қўшимча қилган Франция президенти.
2 июнь ҳолатига кўра Францияда коронавирус инфекцияси билан касалланганларнинг умумий сони 152 минг нафардан ошган, 68 минг киши COVID-19’дан тузалган, 28 833 нафар бемор касаллик асоратлари оқибатида вафот этган.Бутун дунёда коронавирусга чалинганлар сони 6,26 миллиондан ошиб кетган. Пандемия бошланганидан бери 375 мингдан зиёд ўлим ҳолати қайд этилган, 2,69 миллион киши коронавирусдан тузалган.
Изоҳ (0)