Coursera йирик онлайн таълим платформаси 1 июндан бошлаб бутун дунё талабаларига бепул ўқиш имкониятини тақдим этди. Бу ҳақда сервис матбуот хизмати маълум қилди.
Талабалар учун 3 800 дан ортиқ курслар, соҳа мутахассислар иштирокидаги 150 та интерфаол лойиҳалар, 400 та мутахассислик ва 11 та профессионал сертификатлаш дастурлари бепул тақдим этилади.
Ҳозирда ўқиётган ва битирувчи талабалар ўзларининг таълим муассаасалари доменларида тасдиқланган электрон почта манзиллари билан рўйхатдан ўтиш орқали ушбу курсларда бепул ўқиш ва сертификат олишлари мумкин.
Курсларга бепул рўйхатдан ўтиш 31 июлгача давом этади. Танланган дастурлардан 30 сентябргача ўтиш лозим. Ушбу санадан кейин талабалар фақат соҳа мутахассислари иштирокидаги интерфаол лойиҳаларга бепул киришлари мумкин.
Coursera директори Шраван Голининг таъкидлашича, ушбу ташаббус коронавирус туфайли ўқиши ёки амалиёти тўхтаб қолган ёки бекор қилинган талабаларга ёрдам беришга қаратилган.
Апрель ойи охирларида коронавирус туфайли ишини йўқотган кишиларга бепул курсларни тақдим этганди.
Coursera ҳам бепул, ҳам пуллик курсларни тақдим этади, аммо курсни битирганлик ҳақидаги сертификат учун пул тўлаш лозим. Хизматга йиллик обуна 399 долларни ташкил этади.
Изоҳ (0)