Sardobaga jalb etilgan Mudofaa vazirligi harbiy xizmatchilari o‘z xizmat joylariga qaytdi

Sirdaryo viloyatiga safarbar etilgan harbiy xizmatchilar doimiy xizmatni o‘tash joylariga qaytdi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.

2020-yilning 1-may kuni ertalab Sirdaryo viloyatidagi Sardoba suv ombori to‘g‘oni o‘pirilishi oqibatida texnogen tusdagi favqulodda vaziyat yuz berib, viloyatning Sardoba, Oq oltin va Mirzaobod tumanlarida aholi yashash manzillari va hududlar suv va ko‘chki ostida qoldi. Binolar, yo‘llar, kommunikatsiya tarmoqlari vayron bo‘ldi, aholi vaqtincha boshqa hududlarga evakuatsiya qilindi.

“Toshqin oqibatlarini bartaraf etishga ko‘maklashish maqsadida Mudofaa vazirligining barcha harbiy okruglaridan harbiy xizmatchilar Sirdaryo viloyatiga safarbar etilgan edi. O‘tgan muddat davomida harbiy xizmatchilar qo‘yilgan ustuvor vazifani ado etib, aholi yashash manzillari, hududlar, infratuzilma va ijtimoiy obyektlar, yo‘llar va telekommunikatsiya tarmoqlarida tozalash, tiklash va bunyodkorlik ishlarida fidoyilik ko‘rsatishdi”, — deyiladi xabarda.

Ta’kidlanishicha, 1-iyun kuni harbiy xizmatchilar buyruqqa asosan o‘zlarining doimiy xizmatni o‘tash joylariga qaytgan. Mudofaa vazirligi harbiy avtomobil nazorati inspeksiyasi va Ichki ishlar vazirligi yo‘l harakati xavfsizligi bosh boshqarmasi xodimlari tomonidan kolonnalarning yo‘llarda xavfsiz harakatlanishi ta’minlangan. Sharqiy harbiy okrug qo‘shinlari esa Guliston—Marg‘ilon yo‘nalishida temiryo‘l platformalari orqali manzilga yetib borgan.

Mudofaa vazirligi axborot va ommaviy kommunikatsiyalar departamenti boshlig‘i polkovnik Bahrom Zulfiqorov Sardoba suv ombori bilan yuz bergan falokat tafsilotlari haqida ma’lum qiladi:

• 750 ta xonadonni tozalash, chiqindilarni olib tashlash va yangi qurilish mollarini tashish ishlari amalga oshirildi;
• 6 ta aholi punktida 1405 nafar harbiy qurilish hududida qurilish chiqindilarini olib chiqishda ishtirok etdi;
• Maxsus aloqa bo‘limi tomonidan 1,5 km, 20 ta ustun aloqa kabeli demontaj qilindi. Talafot ko‘rgan 40 ta aloqa mobil bazasi tiklandi;
• 4 ta hududdagi 156 nafar mavsum boshidan buyon 4603 nafar fuqaroga tibbiy yordam ko‘rsatildi.
• Harbiy tibbiy xodimlar tomonidan 200 ga yaqin aholidan tahlillar olindi;
• Harbiy topograflar tomonidan talafot ko‘rgan hududlarning 1000 tadan ortiq aero va kosmik suratlari tayyorlandi.