Ўзбекистоннинг Жаҳон савдо ташкилотига аъзо бўлиши учун идоралараро комиссия тузилди

Вазирлар Маҳкамасининг 2020 йил 28 майдаги «Жаҳон савдо ташкилоти билан ишлаш бўйича идоралараро комиссия тўғрисидаги низомни тасдиқлаш ҳақида»ги қарорига асосан Жаҳон савдо ташкилоти билан ишлаш бўйича идоралараро комиссия тузилди. Бу ҳақда Norma хабар берди.

Маълум қилинишича, Жаҳон савдо ташкилоти билан ишлаш бўйича идоралараро комиссия Ўзбекистоннинг Жаҳон савдо ташкилотига (ЖСТ) аъзо бўлиши бўйича ишларни мувофиқлаштирувчи ва йўналишларни белгилайдиган коллегиал орган ҳисобланади. Низом билан идоралараро комиссиянинг вазифалари ва функциялари, таркиби, фаолиятини ташкил этиш ва ишлаш тартиби белгиланган.

Қуйидагилар идоралараро комиссиянинг асосий вазифалари ҳисобланади:

• ЖСТ котибиятига ёки ЖСТга аъзо мамлакатларга келгусида юбориш учун идоралараро комиссияга кўриб чиқиш учун тақдим этилган ҳужжатларни келишиш ва тасдиқлаш;
• ЖСТ қоидалари ва тамойилларига мувофиқлаштириш ва уйғунлаштириш мақсадида идоралараро комиссия аъзолари ва соҳага оид ишчи гуруҳларнинг Ўзбекистон Республикаси қонун ҳужжатларига зарур ўзгартириш ва қўшимчалар киритиш тўғрисидаги таклифларини келишиш;
• ЖСТ билан ишлаш бўйича музокаралар гуруҳи билан биргаликда стратегик масалалар бўйича, шу жумладан, Ўзбекистоннинг ЖСТга кириши шартлари, шунингдек, ЖСТ аъзоси бўлган мамлакатлар билан икки томонлама, кўп томонлама ва ҳар тарафлама савдо музокаралари жараёнидаги келишувлар ва шартномалар бўйича Ўзбекистоннинг умумий позициясини ишлаб чиқиш.

Идоралараро комиссия ўз фаолиятини йиғилишлар шаклида амалга оширади, улар бир йилда камида икки марта ўтказилади. Идоралараро комиссия йиғилишларига материалларни тайёрлаш унинг котибияти — Инвестициялар ва ташқи савдо вазирлигининг ЖСТ билан ҳамкорликни мувофиқлаштириш бошқармаси томонидан амалга оширилади. Кўриладиган масалалар бўйича қарорлар комиссия аъзолари томонидан очиқ овоз бериш орқали кўпчилик овоз билан қабул қилинади.

Идоралараро комиссия Вазирлар Маҳкамасига ўтказилган йиғилиш якунлари бўйича ҳисобот киритади.

Эслатиб ўтамиз, Ўзбекистон Жаҳон савдо ташкилоти билан бир қаторда Евросиё иқтисодий иттифоқига кузатувчи сифатида қўшилишни режалаштирмоқда. ЕОИИга қўшилиш ҳақидаги қонун 11 май куни Ўзбекистон Сенати томонидан маъқулланганди.