Ўзбекистон бош вазири Абдулла Арипов «Чашма» чегараолди ҳудудида юз берган можаро муносабати билан 1 июнь куни Фарғона вилояти Сўх туманига қилган ташрифи давомида маҳаллий аҳоли вакиллари билан учрашган эди.
Фото: Сўх тумани ҳокимлиги матбуот хизмати
Учрашув вақтида Риштон—Сўх йўлини очиш масаласи ҳам кўтарилди. Йўл очилиши маросими 2019 йил 30 август куни бўлиб ўтди, аммо 5 сентябрь куни йўл ҳали тўлиқ очилмаганлиги маълум бўлди.
Ўтган йили Қирғизистон бош вазири ўринбосари Жениш Разаков Евросиё иқтисодий иттифоқи (ЕОИИ) билан боғлиқ масалалар ҳал этилиши кераклигини, унинг доирасида Қирғизистоннинг ветеринария ва фитосанитария хавфсизлиги бўйича мажбуриятлари борлигини таъкидлаган.
Ўзбекистон бош вазири Абдулла Арипов йўлнинг ёпилиши ЕОИИ талаблари билан боғлиқлигини тасдиқлади.
«Ўтган йили Риштон—Сўх йўлини очиш масаласини қўйгандик. Икки кун ишлади, кейин ёпилди, тўғрими? Учрашувда Қирғизистон делегацияси раҳбари (Қирғизистон бош вазирининг биринчи ўринбосари Кубатбек Боронов — таҳр.) бунинг учун узр сўради. Улар Евросиё иттифоқига аъзо бўлгани учун, уларнинг талаби билан икки кундан кейин яна ёпишга мажбур бўлган», — деди Абдулла Арипов.
Шунингдек, Ўзбекистон ҳам иттифоққа кузатувчи сифатида аъзо бўлиши режалаштирилаётгани ҳисобга олинса, вазият яқин вақтларда ўзгариши лозимлигини таъкидлади.
«Кузатувчи мақоми мамлакатда барча ҳуқуқлар бўлишини англатади. Биринчи навбатда биз Қирғизистон томон билан Риштон—Сўх йўлини қисқа муддатда очиш масаласини қўйдик. Бу дегани Фарғонага олиб борувчи йўл 80 километрга қисқаради. Энди у давлат раҳбарига бориб айтади, мен ҳам Президентга бу ердаги гаплар бўйича ҳисобот бераман», — деган Абдулла Арипов.
Эслатиб ўтамиз, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳоли ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.
Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбай Жээнбеков билан телефон орқали мулоқот қилди. Мулоқот чоғида бундай вазият бошқа такрорланмаслиги учун чоралар қабул қилиш муҳимлиги таъкидланган.
