Ўзбекистон Президенти администрацияси Давлат резиденсияларига хизмат кўрсатиш ва тадбирларни ташкил этиш бошқармасининг «Кўксарой» қароргоҳи 2020 йилнинг 23 март куни Akfa Dream World компанияси билан умумий овқатланиш хизматларини кўрсатиш бўйича шартнома имзолаган. Давлат харидлари порталида келтирилган маълумотларга кўра, 40 кунга мўлжалланган шартноманинг умумий қиймати 400 миллион сўмга тенг.
Шартномага мувофиқ, Akfa Dream World компанияси Тошкент вилоятининг Қибрай тумани «Дўрмон» қишлоқ фуқаролар йиғинида жойлашган резиденсияда соат 9:00 дан 19:00 га уч маҳал овқатланишни ташкил этиши назарда тутилган. Шартномада 40 кун давомида 92 кишига нонушта (кунига 2,76 миллион сўм), 94 кишига тушлик (кунига 3,76 миллион сўм) ва 87 кишига (кунига 3,48 миллион сўм) кечки овқат ташкил этилиши кўрсатилган (кунига — жами 10 миллион сўм). Бунда бир киши учун нонушта қиймати 30 минг сўмг, тушлик ва кечки овқат 40 минг сўмдан — кунига 110 минг сўмни ташкил этади.
«Anhor.uz»нинг тадбиркорлар реестридаги маълумотларга асосланиб ёзишича, Akfa Dream World моторли транспорт воситаларини ишлаб чиқариш фаолиятини амалга оширувчи компания. Унинг устав фонди 612,6 миллиард сўмга тенг.Компания таъсисчилари — Баҳодир Абдуллаев (8,6 фоиз улуш), Asia Electron (12,92 фоиз), Perfect Plast Profil (19,23 фоиз), Wide Tent System (37,88 фоиз), Techno Continental (19,23 фоиз).
Ўз навбатида Techno Continental компанияси устав фондининг 62,45 фоизи Artel Electronics’га тегишли. 37,5 фоизи эса — Ilk Sabah Insaat Anonim Sirketi ихтиёрида.
Давлат харидлари порталига жойлаштирилган шартномада Akfa Dream World компанияси манзили Ислом Каримов кўчаси 5-блок, 1—2-уй қилиб кўрсатилган. Ушбу манзилда Tashkent City жойлашган.
Изоҳ (0)