Бухоро вилоятининг Шофиркон ва Ғиждувон туманлари — «қизил», Когон тумани эса «сариқ», қолган барча шаҳар ва туманлар «яшил» тоифадаги ҳудудларга киритилади. Вилоят ҳокимлигида қабул қилинган қарор Республика махсус комиссияси қарори билан тасдиқланиши кутилмоқда.
«Куни кеча Бухоро вилоятида коронавирус инфекцияси кириб келиши ва тарқалишининг олдини олиш бўйича вилоят комиссиясининг навбатдаги йиғилиши бўлиб ўтди. Йиғилишда вилоятда коронавирус инфекциясини тарқалишининг олдини олиш борасида кўрилаётган чора-тадбирлар ҳамда аҳолининг санитария-эпидемиологик осойишталигини таъминлаш борасидаги устувор вазифалар муҳокама қилинди. Йиғилишда вилоятда коронавирус инфекцияси тарқалиши ҳолати таҳлили, касаллик аниқланган беморларнинг динамикасидан келиб чиқиб, вилоят санитария-эпидемиологик осойишталик маркази ҳамда соғлиқни сақлаш бошқармаси хулосасига кўра, Шофиркон ва Ғиждувон туманларини ‘қизил’, Когон туманини ‘сариқ’, қолган барча шаҳар ва туманларни ‘яшил’ тоифадаги ҳудудларга ажратиш, буни Республика махсус комиссияси қарори билан тасдиқлаб олиш таклифи маъқулланди», — дейилади Бухоро вилояти ҳокимлиги матбуот хизмати хабарида.
Маълум қилинишича, ҳозирда инфекция аниқланган Шофиркон туманидаги Регион қишлоғида 274 та хонадонда 1286 нафар, «Хожа Ориф» МФЙ М.Ашрафий кўчасида 1814 та хонадонда 8074 нафар фуқаро карантинга олинган.
Мазкур ҳудудларда хизматни олиб боришга 312 нафар ҳуқуқни муҳофаза қилувчи органлар ходимлари жалб этилган.
Эслатиб ўтамиз, 31 майда Шофирконда коронавирусга чалинган ҳайдовчи билан мулоқотда бўлганларда касаллик аниқлангани, 30 май куни эса Бухорода коронавирусга чалинган оила билан мулоқот қилган 268 фуқаро карантинга олингани хабар қилинганди.
Изоҳ (0)