Тонгдаги қайси одатлар озишга ёрдам беради?

Вазн ташлаш учун фақатгина спорт билан шуғулланишнинг ўзи етарли эмас. Кундалик, хусусан, тонгги одатлар киши саломатлиги ва ташқи кўринишида муҳим аҳамият касб этади. Қайси одатлар озишга ёрдам беради? Қуйида ушбу саволга жавоб берамиз.

Тонгни 1 стакан сув билан қарши олинг

Кунига қанча сув ичиш керак, деган саволга Жаҳон соғлиқни сақлаш ташкилоти инсон вазнининг бир килосига 30 мл сув ичиши керак, деб жавоб беради. Тушунарлироқ қилиб айтганда, 70 кг одам бир кунда 2 литр 100 мл сув ичиши керак.

Нонушта қилишни унутманг

Нонушта кунлик энергия манбайи ҳисобланади. Нонуштани ўтказиб юборган одам энергия етишмагани ҳисобига кун давомида кўпроқ егулик ейиши, бунинг оқибатида эса вазн тўплаши аниқланган. Энг кўп очлик ҳисси кечқурун сезилади ва бу вақтда одатдан кўпроқ истеъмол қилинган таом яхши ҳазм бўлмайди, уйқуга ётганда калориялар ёғга айланиб, қорин, бел қисмларига йиғилади. Шу боис вақтида фойдали витаминларга бой нонушта қилишни унутманг.

Нонуштангиздан оқсилга бой маҳсулотлар ўрин олсин

Парҳезшуносларнинг таъкидлашича, озмоқчи бўлганлар нонуштага оқсилга бой таом истеъмол қилиши керак. Оқсил, очлик ҳиссини уйғотадиган грелин гармонини камайтириш хусусиятига эга. Нонуштага таркибида оқсил мўл бўлган қайнатилган тухум, омлет, мевали йогурт, творог ёки авокадоли сендвич истеъмол қилинг.

Тўйиб ухланг

Уйқусизлик организмда очлик ҳиссини қўзғатувчи гормонларни ишлаб чиқаришга таъсир қилади. Тўйиб ухламаган одамда кўп калорияга эҳтиёж бўлади. Бундан ташқари, уйқусизлик стрессни юзага келтирувчи зўриқиш гармонини ҳам қўзғайди. Кортизолнинг ортиқча даражаси иштаҳани кучайтиради бу вазн тўплашга мойилликни келтириб чиқаради.

Вазнингизни назорат қилинг

Ўтказилган тадқиқотларда аниқланишича, ҳар куни вазнини ўлчайдиганлар олти ойда олти килодан кўп вазн ташлаган. Истеъмол қилган таом ёки маҳсулотингиз таркибидаги калория қанча ва сиз ундан қанчасини сарфлаганингизга эътиборли бўлинг.