АҚШ ҳудудида коронавирус билан касалланиш ва унинг оқибатида юзага келаётган ўлим ҳолатлари камаймоқда. Бу ҳақда президент Дональд Трамп Оқ уйда йирик бизнес вакиллари билан ўтказилган йиғилишда маълум қилди.
«Бутун мамлакат бўйлаб янги ҳолатлар ва ўлимлар сони қисқармоқда… Эртага журналистларга COVID-19’га тест ўтказиш бўйича катта ҳисоботни тақдим этамиз», — дейди Трамп бирор-бир аниқ рақамларни келтирмаган ҳолда.
Президентнинг қўшимча қилишича, пандемия Америка иқтисодиётига жиддий зарар етказган, бироқ ҳозирда иқтисодиёт ва вирусга қарши вакцинани яратиш борасида дастлабки кўрсаткичлар қайд этилмоқда. «Ўйлашимча, тез орада жуда яхши натижаларга эришамиз. Вакцина қўлимизда бўлгач, уни зудлик билан тарқата оламиз», — дейди Оқ уй раҳбари.
Жонс Ҳопкинс университети маълумотларига кўра, АҚШда коронавирус билан касалланганлар сони 1,745 миллион кишидан ошган. Ўтган бир сутка ичида яна 22,6 минг кишида вирус аниқланган. Ҳозирга қадар мамлакатда 406 минг америкалик коронавирусдан даволанишга муваффақ бўлган, 102,7 минг киши COVID-19 қурбонига айланган.
Изоҳ (0)