Қозоғистонда коронавирусга чалинганлар сони 10 минг кишидан, Қирғизистонда эса 1,7 минг кишидан ошди

Қозоғистонда ўтган бир сутка ичида яна 450 кишида коронавирус инфекцияси аниқланди, деб хабар беради Tengrinews.

Мамлакат бўйлаб касаллар сонининг ортиши 4,5 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Нур-Султон — 89 (4,8 фоиз);
• Чимкент — 51 (6,7 фоиз);
• Атирау вилояти — 44 (4,5 фоиз);
• Қарағанда вилояти — 41 (5,2 фоиз);
• Олмаота — 37 (1,5 фоиз);
• Ғарбий Қозоғистон вилояти — 36 (6,6 фоиз);
• Ақтўбе вилояти — 34 (11,2 фоиз);
• Костанай вилояти — 29 (21,3 фоиз);
• Олмаота вилояти — 23 (7,1 фоиз);
• Шарқий Қозоғистон вилояти — 17 (17,5 фоиз);
• Қизилўрда вилояти — 16 (4,8 фоиз);
• Туркистон вилояти — 10 (2,8 фоиз);
• Павлодар вилояти — 8 (4,1 фоиз);
• Манғистов вилояти — 7 (3,2 фоиз);
• Жамбил вилояти — 5 (1,4 фоиз);
• Шимолий Қозоғистон вилояти — 3 (5,9 фоиз).

Бутун мамлакат бўйлаб коронавирусга чалинганлар сони 10 382 кишига етган. Ҳозирга қадар 5057 киши соғайган, 37 киши вирус қурбонига айланган.Қирғизистонда ўтган бир сутка ичида яна 60 кишида коронавирус аниқланди. Бу ҳақда мамлакат Соғлиқни сақлаш вазирлиги хабар берди.

Янги аниқланган беморларнинг 32 нафари Норин вилояти ҳисобига тўғри келади. Бишкекда ўтган бир сутка ичида 25 кишида COVID-19 аниқланган — уларнинг 2 нафари Россиядан келган курсантлар. Чуй вилоятида эса 3 кишида вирус аниқланган — уларнинг 2 нафари Россиядан келган.

Бутун мамлакат бўйлаб коронавирусга чалинганлар сони 1722 кишини ташкил этмоқда. Маълумотларга кўра, ўтган бир сутка давомида коронавирусга чалинган 25 киши соғайган бўлиб, Қирғизистонда касалликдан тузалганларнинг жами сони 1113 кишига етди. Ҳозирда 593 киши шифохоналарда қолмоқда (6 нафари жонлантириш бўлимида), бугунгача 16 бемор COVID-19 қурбонига айланган.

Тожикистонда эса 29 май ҳолатига кўра, касалланганлар сони 123 кишига кўпайиб, 3686 кишига етди, деб хабар беради «РИА Новости».

Маълумотларга кўра, мамлакатда янги турдаги COVID-19 коронавирус инфекциясидан тузалганларнинг умумий сони эса 1769 нафарга етган. Касаллик оқибатида 47 нафар бемор вафот этган.

Ўзбекистонда 2020 йил 30 май соат 10:00 ҳолатига кўра, коронавирус инфекцияси қайд этилганлар сони 3513 нафарни ташкил этмоқда. Шу кунгача мамлакатда беморларнинг 2728 нафари соғайиб, реабилитацияга кузатилган, 771 нафар бемор даволанишда қолмоқда. Улардан 7 нафари оғир, 1 нафари эса ўта оғир аҳволда. Мамлакатда ҳозирга қадар 14 киши эса инфекция асоратлари оқибатида вафот этган.