Шимолий Корея ҳукумати АҚШни ўз имижига путур етказишда айбламоқда. Пхеньяннинг ҳисоблашича, киберҳужумлар борасидаги айблов — КХДРни қоралашга бўлган уринишдан бошқа нарса эмас. Бу ҳақда КХДР Ташқи ишлар вазирлигига таяниб, Reuters хабар берди.
«Яна бир маротаба қайд этамизки, АҚШ гапираётган киберҳужумга мамлакатимизнинг ҳеч қандай алоқаси йўқ», — дейди дипломатлар.
Вазирлик баёнотида таъкидланишича, АҚШнинг мақсади Шимолий Корея обрўсига путур етказиш. Террорчиликни молиялаштириш ва пул ювиш борасидаги айбловлар ҳам шунга тааллуқли.
Маълумотларга кўра, ФҚБ ва АҚШнинг бир қатор федераль идоралари май ойида Шимолий кореялик хакерлар ҳужуми ҳақида огоҳлантириш эълон қилган. Қайд этилишича, хакерлар шахсий маълумотларни ўғирлаш, рақамли валюталар ва йирик ғарб банкларини ўмариш билан шуғулланади. Адлия департаменти Шимолий Корея давлат банкини Америка санкцияларини айланиб ўтишда айблаган ва 28 нафар КХДР фуқаросига нисбатан жиноят иши очган.
Аввалроқ Хитой АҚШни янги совуқ урушни бошлашга ундаётганликда, ядровий қуроллар бўйича Вашингтон Пхеньян билан тарихий келишувларни бузишда айблаган эди.
Изоҳ (0)