Хитойда сўнгги суткада коронавирус билан касалланиш бўйича 4 та ва касаллик белгисиз ўтаётган 4 та ҳолат қайд этилди. Беморларнинг 11 нафари соғайди, вафот этиш ҳолатлари қайд этилмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Фото: Reuters
Хитойда умумий ҳисобда 82 995 киши коронавирусга чалинган. Беморларнинг 78 302 нафари соғайган, 4634 нафари вафот этган. Касалхоналарда 63 нафар бемор қолмоқда.
Шунингдек, сутка давомида 4 киши инфекцияни белгиларсиз ташувчи сифатида қайд этилган. Шундай кишиларнинг яна 396 нафари шифокорлар назоратида бўлиб турибди.
Жанубий Кореяда эса сутка давомида 39 киши коронавирусга чалингани қайд этилиб, касалланганларнинг умумий сони 11 441 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.
Янги касалланиш ҳолатларининг 27 тасида беморлар вирусни мамлакатнинг ўзида, қолган 12 таси эса четдан юқтирган.
Сўнгги кунларда мамлакатда кунлик касалланишлар сони 40-80 кишини ташкил қилмоқда. Эпидемия бошланганидан буён кунлик касалланишлар сони 80-90 тадан 10-20 тагача камайган, 6 май куни эса бу кўрсаткич 2 кишигача тушганди. Янги касалланиш ўчоқларининг пайдо бўлиши касалланишлар сони яна ортишига сабаб бўлмоқда.
Сеулнинг одам гавжум бўлган Итхэвон ҳудудидаги клуб ва барларда касаллик юқтирганлар сони камида 266 нафарга етди. Коронавирусга чалинишнинг олдини олиш бўйича чораларга етарлича амал қилмаган Пучон шаҳридаги Coupang компанияси омборхонасида эса камида 102 киши вирусни юқтириб олган.
Мамлакатда сўнгги суткада 35 киши коронавирусдан соғайиб чиқиб, тузалганларнинг умумий сони 10 393 кишига етди. Соғайиш кўрсаткичи 90,9 фоизни ташкил қилмоқда. Вирус қурбонлари сони ўзгармаган, 269 кишини ташкил қилмоқда.
Изоҳ (0)