АҚШ президенти Дональд Трамп Оқ уйда журналистлар қаршисида чиқиш қилиб, Twitter ижтимоий тармоғини ёпиб юбориш ниятида эканлигини маълум қилди, деб хабар беради Business Инсидер.
«Ўйлашимча, Twitter’ни ёпиб юбора оламан. Бироқ юридик жараёнлардан ўтиш керак. Агарда уни қонуний равишда ёпиш имкони бўлса, мен буни амалга оширган бўлардим», — дейди Америка президенти.
Трамп бу каби изоҳни «онлайн цензуранинг олдини олиш» ва ижтимоий тармоқларни тартибга солиш тўғрисидаги ижро буйруғини имзолаганидан сўнг билдирган. Ҳужжат коммуникация соҳасидаги этика тўғрисидаги қонуннинг 230-қисмига янги трактовка (шарҳ) беради. Ушбу моддага кўра, ижтимоий тармоқлар фойдаланувчилар томонидан жойлаштирилган контент учун жавоб бермайди, бироқ номақбул, ҳақоратли ёки зўравонликка чорловчи материалларни блоклаши ёки ўчириб ташлаши мумкин.
Трамп ижтимоий тармоқларни уларда «назорат қилиб бўлмас ҳокимият» пайдо бўлганликда айблаган.
Қарорга кўра, онлайн платформалар, танланган цензурани амалга оширади, контент ҳатто хизматларни тақдим этиш учун кўрсатилган шартларнинг бирортасини бузмаса ҳам уни номақбул, деб белгилайди. Компания сиёсатига эълон қилинмаган ва тушунарсиз ўзгартиришларни киритади, бу эса маълум нуқтаи назарларга кўра обрўсизлантиришга олиб келади, контентларни ва бутун бошли аккаунтларни огоҳлантиришсиз ҳамда асоссиз равишда ўчириб ташлайди.
Қарорга мувофиқ, регуляторлар ижтимоий тармоқларни улар ўз платформаларидаги контентни назорат қилмагани учун судга бера олади.
Аввалроқ Трамп Twitter’ни сайлов жараёнларига аралашганликда айблаганди.
Эслатиб ўтамиз, 27 май куни Трамп оммавий равишда ижтимоий тармоқларнинг АҚШдаги фаолиятини қаттиқ назорат остига олишини маълум қилганди. Бу каби баёнотни президент Twitter’да ўзининг бир неча постларида ёзилган маълумот ишончли эмаслиги ва уни текшириб кўриш лозимлигини билдирувчи махсус белги пайдо бўлгач билдирган.
Изоҳ (0)