Хитойда сутка давомида янги касалланиш ҳолатлари қайд этилмади, Жанубий Кореяда эса яна 58 киши коронавирусга чалинди

Хитойда бир ҳафта ичида иккинчи марта сутка давомида коронавирусга чалиниш бўйича бирорта ҳолат қайд этилмади, беморларнинг 3 нафари соғайди, деб хабар бермоқда «РИА Новости» Хитой Соғлиқни сақлаш миллий комиссиясига таяниб.

22 май куни мамлакатда эпидемия бошланганидан буён биринчи бор коронавирусга чалиниш бўйича янги ҳолат қайд этилмаганди. Эртаси куни эса 3 кишида касаллик аниқланган.

Хитойда умумий ҳисобда 82 995 киши коронавирусга чалинган. Беморларнинг 78 291 нафари соғайган, 4634 нафари вафот этган. Касалхоналарда 60 нафар бемор қолмоқда.

Шунингдек, сутка давомида 5 киши инфекцияни белгиларсиз ташувчи сифатида қайд этилган. Шундай кишиларнинг яна 409 нафари шифокорлар назоратида бўлиб турибди.

Жанубий Кореяда эса сутка давомида 58 киши коронавирусга чалингани қайд этилиб, касалланганларнинг умумий сони 11 402 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.

Бундан бир кун аввал касалланишлар сони ортиб, 79 кишида коронавирус аниқланганди. Эпидемия бошланганидан буён кунлик касалланишлар сони 80-90 тадан 10-20 тагача камайган, 6 май куни эса бу кўрсаткич 2 кишигача тушганди.

Сеулнинг одам гавжум бўлган Итхэвон ҳудудидаги клуб ва барларда касаллик юқтирганлар сони камида 266 нафарни ташкил қилмоқда.

Коронавирусга чалинишнинг олдини олиш бўйича чораларга етарлича амал қилмаган Пучон шаҳридаги Coupang компанияси омборхонасида эса камида 97 киши вирусни юқтириб олган. Айни пайтда омборхонанинг ходимлари ва унга ташриф буюрган жами 4159 киши карантинга олинган. Жума куни уларнинг коронавирусга тест натижалари чиқиши лозим. Уларнинг ўқийдиган ёки таълим муассасаларида ишлайдиган қариндошларига ишга ёки ўқишга бориш тақиқланган. Агар боришган бўлса, бутун муассаса карантинга ёпилади.

Мамлакатда сўнгги суткада 23 киши коронавирусдан соғайиб чиқиб, тузалганларнинг умумий сони 10 363 кишига етди. Соғайиш кўрсаткичи 90,9 фоизни ташкил қилмоқда. Вирус қурбонлари сони ўзгармаган, 269 кишини ташкил қилмоқда.

Жанубий Кореяда коронавирусни аниқлаш бўйича 850 тадан ортиқ тест ўтказилган.