Қозоғистонда коронавирусга чалинганлар сони 10 минг кишига яқинлашди, Қирғизистонда эса яна 26 нафар курсантда вирус аниқланди

Қозоғистонда ўтган бир сутка ичида яна 356 кишида коронавирус аниқланди, деб хабар беради Tengrinews.

Мамлакат бўйлаб касаллар сонининг ортиши 3,7 фоизни ташкил этмоқда. Коронавирусга чалиниш бўйича янги ҳолатлар қуйидаги вилоятларда аниқланган:

• Олмаота — 84 (3,5 фоиз);
• Ғарбий Қозоғистон вилояти — 51 (10,3 фоиз);
• Нур-Султон — 48 (2,6 фоиз);
• Манғистов вилояти — 40 (22,6 фоиз);
• Қарағанда вилояти — 34 (4,5 фоиз);
• Чимкент — 32 (4,4 фоиз);
• Шарқий Қозоғистон вилояти — 23 (31,1 фоиз);
• Атирау вилояти — 21 (2,2 фоиз);
• Олмаота вилояти — 7 (2,2 фоиз);
• Қизилўрда вилояти — 6 (1,9 фоиз);
• Павлодар вилояти — 5 (2,6 фоиз);
• Жамбил вилояти — 3 (0,8 фоиз);
• Ақмўла вилояти — 2 (1,3 фоиз).

Қирғизистонда ўтган бир сутка ичида яна 68 кишида коронавирус аниқланди, деб хабар беради мамлакат Соғлиқни сақлаш вазирлиги вакили. Янги аниқланган беморларнинг 35 нафари Бишкек шаҳри ҳисобига тўғри келади — уларнинг 26 нафари Санкт-Петербургдан келган курсантлар.

Бундан ташқари, Россиянинг Бузулук шаҳридан автобусда келган қирғизистонликларнинг 21 нафарида ҳам COVID-19 аниқланган — уларнинг 11 нафари ҳомиладор ва 10 нафари талаба.

Маълумотларга кўра, ўтган бир сутка давомида коронавирусга чалинган 22 киши соғайган бўлиб, бутун мамлакат бўйлаб коронавирусдан тузалганлар сони 1088 кишига етди.

Тожикистонда эса 28 май ҳолатига кўра, касалланганлар сони 139 кишига кўпайиб, 3563 кишига етган.

Ўтган бир суткада мамлакатда 99 киши касалликдан тузалган, тузалганларнинг умумий сони эса 1674 нафарга етган. Касаллик оқибатида 47 нафар бемор вафот этган.