Ижтимоий тармоқларда 27 май куни Сурхондарё вилоятининг Денов шаҳридаги Амир Темур ҳайкали кенг муҳокамага сабаб бўлди. Фойдаланувчиларнинг фикрича, унинг қўлидаги Темурийлар салтанати белгиси туширилган буюм гилам қоққичга ўхшайди. Денов тумани ҳокимлиги мазкур муҳокамаларга ўз муносабатини билдирди ва ҳайкалдаги белги юзасидан тушунтириш берди.
Фото: Денов тумани ҳокимлиги
Маълум қилинишича, ҳайкал Денов шаҳар ҳокимлигининг 1996 йил 25 апрелдаги фармойишига асосан бунёд этилган. Ҳайкалда Амир Темурнинг уч ҳалқадан иборат белги бириктирилган ҳассани қўлида тутган сиймоси акс этган.
Қайд этилишича, уч ҳалқа Темур ва Темурийлар салтанати байроғи, тамғаси ва тангаларида тасвирланганлиги тарихий манбаларда келтириб ўтилган.
«Амир Темур саройида хизмат қилган араб тарихчиси Ибн Арабшоҳ, Самарқандга испан элчиси сифатида келган Руи Гонзалес де Клавихо томонида келтирилган маълумотларда ва бошқа илмий рисолаларда қайд этилишича, бир-бирига туташган уч ҳалқа тасвирининг Амир Темур байроғи, тамғаси ва тангаларига туширилиши бу унинг Ер юзидаги уч иқлим, яъни шимол, жануб ва ғарб ҳудудларини ўз ҳукмронлиги остида бирлаштирганини, дунёнинг уч қисми подшоси эканлигини ифодалаган.
Қўлида уч ҳалқадан иборат белги бириктирилган ҳасса тутган Амир Темур ҳайкали бобокалонимизнинг шон-шуҳрати, уч иқлимни бирлаштирган енгилмас машҳури замон бўлганлиги рамзидир», — дейилади ҳокимлик баёнотида.
Ҳокимлик томонидан маълум қилинишича, Ўзбекистон Президентининг «2020—2022 йилларда Сурхондарё вилоятининг Денов тумани ва унинг марказини комплекс ижтимоий-иқтисодий ривожлантириш тўғрисида»ги қарори қабул қилинган. Ушбу қарорда Денов тумани марказидаги хиёбонда ўрнатилган Амир Темур ҳайкали қайта реконструкция қилиш кўзда тутилган.
