Ўзбекистон, АҚШ ва Афғонистон видеоконференцияда коронавирус пандемияси сабабли Афғонистон аҳолисига кўрсатиладиган халқаро ёрдамни кенгайтириш зарурлигини маълум қилди. Бу ҳақда Ўзбекистон Ташқи ишлар вазирлиги хабар берди.
Вазирлик томонидан маълум қилинишича, 2020 йил 27 май куни видеоконференцалоқа шаклида Ўзбекистон—АҚШ—Афғонистон биринчи уч томонлама мажлиси бўлиб ўтди. Тадбир Ўзбекистон ташқи ишлар вазири Абдулазиз Комилов, АҚШ Давлат котибининг сиёсий масалалар бўйича ўринбосари Девид Ҳейл ва Афғонистон ташқи ишлар вазири Ҳаниф Атмар иштирокида бўлиб ўтди.
Видеоконференция иштирокчиларининг қайд этишича, COVID-19 пандемияси афғон халқига инсонпарварлик ёрдамини бериш, аввало, дори-дармон ва озиқ-овқат маҳсулотлари билан таъминлаш бўйича халқаро ҳамкорликни кенгайтириш зарурлигини тақозо этмоқда.
Ўзбекистон ТИВ томонидан маълум қилинишича, АҚШ ва Афғонистон вакиллари Ўзбекистон раҳбариятига Афғонистонга товарларни узлуксиз етказиб бериш, шунингдек, коронавирус тарқалиши даврида транзит юк ташиш таъминлангани учун миннатдорлик изҳор этган.
Ташқи сиёсат идоралари раҳбарлари Ўзбекистон—АҚШ—Афғонистон уч томонлама шакли Афғонистондаги тинчлик жараёнини илгари суриш, мамлакат иқтисодиётини тиклаш, шунингдек, уни минтақавий иқтисодий жараёнларга фаол жалб этишга қаратилган амалий таклифларни тайёрлаш бўйича долзарб маслаҳатлашув механизми эканлигини қайд этди.
Таъкидланишича, томонлар Афғонистон инклюзив ҳукуматини шакллантириш ва Миллий ярашув бўйича Олий кенгашни ташкил этиш тўғрисидаги жорий йил 17 майда имзоланган сиёсий битим тузилишини, Афғонистон ҳукумати ва «Толибон» ҳаракати томонидан маҳбусларни озод қилиш амалиётини давом эттирилишини юқори баҳолади.
Вазирлик баёнотига кўра, Сурхон—Пули-Хумри электр узатиш линияси, Покистон денгиз портларига чиқиш имконини берувчи Мозори-Шариф—Кобул, Мозори-Шариф—Ҳирот темир йўллари қурилиши каби муҳим лойиҳаларни жадал тадбиқ этиш зарурлиги таъкидланди.
«Ишни оптималлаштириш ва уч томонлама шаклда ҳамкорликни самарали йўлга қўйиш мақсадида томонлар муҳокама қилинган ҳамкорлик йўналишлари бўйича тегишли ишчи гуруҳларини ташкил этишга келишиб олдилар. Тадбир якунида Ўзбекистон—АҚШ—Афғонистон уч томонлама учрашувининг қўшма баёноти қабул қилинди», — дейилади ТИВ баёнотида.
Мавзуга доир:Ўзбекистон ҳукумати Афғонистон президенти ва собиқ бош вазири ўртасидаги келишувни қўллаб-қувватлади
Изоҳ (0)