Қашқадарё вилоятининг Китоб туманида яшовчи Ҳамза Қосимов МИБ ходимининг масъулиятсизлиги сабаб Россия давлатига кетиш учун сотиб олган билетига куйган. Бу ҳақда 26 май куни Қашқадарё ҳокими Зоир Мирзаев раҳбарлигида ўтказилган йиғилишда маълум қилинган.
«Пандемия даврида аҳоли мурожаатларини ҳеч бир ташкилот раҳбари тингламай қўйди, — деди вилоят ҳокими. — Шу сабабли Халқ қабулхоналари орқали мурожаатлар кўпайди. Аммо унга ҳам жавоб беришда ёлғон-яшиқ ваъдалар беришдан чарчамадик. Муаммони ёзиб чиқадиган фуқарога душманга қарагандек қарашни йўқотайлик».
Маълум бўлишича, Китоб туманининг «Хўжа илм кони» маҳалласида яшовчи фуқаро Ҳамза Қосимов 2020 йил 13 март куни Китоб шаҳридаги авиакассадан Самарқанд—Москва—Хабаровск йўналишига 2 миллион 850 минг сўмга авиачипта сотиб олган. Аммо аэропортга борганида унга хорижга чиқиш учун тақиқ қўйилганлиги айтилиб, мамлакатдан чиқарилмаган.
Фуқаро тақиқ сабабини билиш учун Китоб туман МИБга мурожаат қилганда МИБ ходимлари тақиқ қўйилганлигини билмаслигини, бу масалани бошқарма орқали текшириш мумкинлигини билдирган. МИБ вилоят бошқармаси бошлиғи ўринбосари А.Пайзиев имзоси билан юборилган жавоб хатида эса фуқарога 2011 йил 13 июндаги суд қарорига кўра, мамлакат ҳудудидан четга чиқишга тақиқ қўйилганлиги, аммо кўп ўтмай бекор бўлганлиги билдирилган.
Бошқарманинг қўшимча қилишича, фуқарога қўйилган тақиқни олиш учун 2020 йил 24 март куни масъул ташкилотларга хат юборилган.
Зоир Мирзаев йиғилишда бу ҳолатни танқид қилиб, «Суд ҳужжатлари ва бошқа органлар ҳужжатларини ижро этиш тўғрисида»ги қонунга кўра, қарздор жисмоний шахснинг четга чиқишини вақтинча чеклашга асос бўлган ижро ҳужжатининг талаблари амалда ижро этилганда ёхуд у бўйича ижро иши юритиш ушбу қонунда белгиланган асосларга кўра тугатилганда ёки тамомланганда, давлат ижрочиси кейинги кундан кечиктирмасдан қарздор жисмоний шахсни, ички ишлар органларини ва Давлат чегарасини қўриқлаш органларини қарздор жисмоний шахснинг четга чиқишини чеклаш олиб ташланганлиги тўғрисида ёзма ёки электрон шаклда хабардор қилиши лозимлиги белгиланганини эслатган.
Вилоят ҳокимининг қўшимча қилишича, ушбу иш бўйича Китоб МИБ бўлими маъсул ходимларига нисбатан жазо қўлланилмаган.
«Ҳолбуки, қўйилган тақиқ вақтида олиб ташланмагани сабаб фуқаро моддий зарар кўрган ва пул маблағлари қайтарилмаган. Бу эса фуқаронинг ҳақли эътирозига сабаб бўлмоқда», — деган вилоят раҳбари.
Изоҳ (0)