Тошкент шаҳрида ҳаракатланувчи бир қатор автобусларнинг ҳаракат йўналишларига ўзгартиришлар киритиш режалаштирилмоқда. Бу ҳақда «Тошшаҳартрансхизмат» маълум қилди.
Маълум қилинишича, мазкур ўзгартиришлар Вазирлар Маҳкамасининг 2020 йил 16 мартдаги «Тошкент шаҳар йўловчи транспортини такомиллаштириш чора-тадбирлари тўғрисида»ги 157-сонли қарори ижросини таъминлаш мақсадида амалга оширилмоқда. Шунингдек, Тошкент шаҳридаги йўналишлар тармоғини мақбуллаштириш ҳамда йўналишларнинг бир-бирини такрорлашини камайтириб, қатнов интервалини қисқартириш ҳам кўзланмоқда.
Режага кўра, 18-сонли «Тузель мавзеси 3-даҳа — Чилонзор мавзеси 25-даҳа АШБ» автобус йўналишининг ҳаракатига ўзгартириш киритилади. Йўналишнинг «Муқимий кўчаси» бекатидан Чилонзор мавзеси 25-даҳа АШБгача бўлган қисмини қисқартириш ҳамда уни «Муқимий кўчаси» бекатидан Қушбеги кўчаси орқали Тўқимачилик комбинатига ташкиллаштириш режалаштирилмоқда.
Йўналиш «Тузель мавзеси 3-даҳа — Тўқимачилик комбинати» оралиғида 7 та жадвал асосида 10-11 дақиқа интервал билан ҳаракатланади. Тўқимачилик комбинатидан янги ташкил этилаётган йўналиш Чилонзор мавзеси 25-даҳа АШБга ҳаракатланади.
25-сонли «Юнусобод 9-даҳа АШБ — ТошГРЭС қўрғони» автобус йўналишининг «Диадора дўкони» бекатидан ТошГРЕС қўрғонигача бўлган қисми қисқартирилади.
Йўналиш ҳаракатини «Диадора дўкони» бекатидан ТТЗ АШБга ҳамда ТТЗ бозоридан Буюк ипак йўли, Шўртепа 2-тор кўча, Султония, Т.Малик, Мингбулоқ кўчалари орқали ташкил қилиш режалаштирилмоқда. Йўналиш «Қорасув 1-мавзеси — Буюк ипак йўли метроси» оралиғида 6 та жадвал асосида 15 дақиқалик оралиқ билан ҳаракатланади.
50-сонли «М.Юсуф кўчаси — Юнусобод 9-даҳаси АШБ» автобус йўналишининг «М.Юсуф кўчаси»дан «Шаҳар архиви» бекатигача бўлган қисми ҳамда «А.Хўжаев» бекатидан Юнусобод 9-даҳаси АШБгача бўлган қисмини қисқартириш режалаштирилмоқда.
Йўналишни «Электрокабель заводи» бекатидан Дўрмон йўли, Зиёлилар, Оққўрғон, Катта Дархон, Оққўрғон, Мустақиллик, Амир Темур, Ислом Каримов кўчалари орқали Тошкент МУМ АШБга ташкил этиш режалаштирилмоқда. Йўналиш «Электрокабель заводи — Тошкент МУМ АШБ» оралиғида 7 та жадвал асосида 8-9 дақиқалик интервал билан ҳаракатланади. Ушбу йўналиш 58 ва 98-йўналишлар қисқартирилаётганлиги сабабли ташкил этилмоқда.
63-сонли «Қорасув 1-мавзеси — Юнусобод 9-даҳа АШБ» автобус йўналишининг «Буюк ипак йўли метроси» бекатидан Юнусобод 9-даҳа АШБгача бўлган қисмини қисқартириш режалаштирилмоқда.
Йўналиш «Қорасув 1-мавзеси — Буюк ипак йўли метроси» оралиғида 6 та жадвал асосида 7 дақиқалик оралиқ билан ҳаракатланади.
148-сонли «‘Баҳор» МФЙ — Жомий майдони» автобус йўналиши ҳаракатининг «Wyndham меҳмонхонаси» бекатидан «Жомий майдони»гача бўлган қисмини қисқартириш режалаштирилмоқда.
Йўналиш «‘Баҳор’ МФЙ — Истиқлол кўчаси» оралиғида 7 та жадвал асосида 12 дақиқалик оралиқ интервал билан ҳаракатланади. Мазкур йўналишдан фойдаланадиган йўловчилар учун «Wyndham меҳмонхонаси» бекатидан «Жомий майдони»га 78-сонли йўналиш орқали етиб олиш имконияти мавжуд.
Маълум қилинишича, 120, 129 ва 183-сонли автобус йўналишлари ўзгаришсиз қолади.
Бундан ташқари, «Тўқимачилик комбинати — Чилонзор мавзеси 25-даҳа АШБ» оралиғида янги йўналиш ташкил этиш режалаштирилмоқда. Ушбу йўналиш 18-сонли йўналишнинг қисқартирилаётганлиги сабабли ташкил қилинмоқда. Йўналиш «Тўқимачилик комбинати — Чилонзор мавзеси 25-даҳа АШБ» оралиғида 6 та жадвал асосида 11-12 дақиқалик интервал билан ҳаракатланади.
Яна бир янги йўналишни «ТТЗ бозори — Туркистон метроси» оралиғида ташкил этиш режалаштирилмоқда. Ушбу йўналиш ТТЗ бозоридан Гулсанам, Гулистон, Чароғон, Университет, ТҲАЙ, Аҳмад Дониш кўчалари орқали «Туркистон метроси»га ташкиллаштирилади. Йўналиш «ТТЗ бозори — Туркистон метроси» оралиғида 6 та жадвал асосида 14-15 дақиқалик интервал билан ҳаракатланади.
Аввалроқ ҳам Тошкентдаги бир қатор автобус йўналишлари қисқартирилиши мумкинлиги ҳақида хабар берилган эди.
Изоҳ (0)