«Битта ҳолат аниқланса, бутун меҳмонхона карантинга олинмайдиган тизим ишлаб чиқиш зарур» — Шавкат Мирзиёев туризм фаолиятини қайта тиклаш ҳақида

Шавкат Мирзиёев 27 май, чоршанба куни туризм ва давлат активларини хусусийлаштириш соҳаларидаги лойиҳалар тақдимоти билан танишди. Бу ҳақда Президент матбуот хизмати хабар қилган.

Хабарда 2020 йил 16 мартдан Ўзбекистоннинг ташқи ва ички туристлар учун ёпилгани, оқибатда 1,5 мингдан ортиқ туроператор, 1,2 мингта меҳмонхона ўз фаолиятини тўхтатгани қайд этилган.

Бу гидлар, миллий ҳунармандчилик, зиёратгоҳ ва сиҳатгоҳлар, умумий овқатланиш, транспорт ва бошқалар билан қўшиб ҳисоблаганда 250 мингдан ортиқ аҳоли даромадига жиддий таъсир қилган.

Пандемиянинг оқибатларини юмшатиш мақсадида соҳага қатор енгилликлар берилди. Жумладан, 1 минг 750 та субъектга мол-мулк, ер ва ижтимоий солиқлардан 60 миллиард сўмга яқин имтиёз тақдим этилган. Лекин бу имтиёз ва преференциялар вақтинчалик. Доимий барқарор ривожланиш учун эса пандемия шароитида ишлашга ўрганиш зарур.

Бу борадаги хорижий тажриба ўрганилиб, «Uzbekistan. Safe travel guaranteed» («Ўзбекистон. Хавфсиз саёҳат кафолатланган») бренди остида туристлар учун санитария-эпидемиологик хавфсизлик тизими ишлаб чиқилди.

Президент ушбу лойиҳа тақдимоти билан танишган. Шунингдек, Ўзбекистонда ички туризмни тиклаш ва ривожлантириш борасидаги келгуси режаларни муҳокама қилган.

Биринчи босқичда «яшил» ҳудудлар ўртасида ички туризмга рухсат бериш зарурлиги таъкидланди. Тоғли жойлар ва кўл бўйларида енгил конструкцияли дам олиш масканларини ташкил этиш бўйича кўрсатма берилди. Ҳокимлар билан биргаликда кўчма дам олиш масканлари дислокацияси тасдиқланиб, электрон порталга жойлаштирилади.

Иккинчи босқичда коронавирус касаллиги жиловланган давлатлар рўйхатини шакллантириб, улар билан туризм алоқаларини босқичма-босқич тиклаш кераклиги таъкидланди.

«Туризм фаолиятини қайта тиклаш учун, энг аввало, меҳмонхоналар қандай ишлайди, туристлар аэропортда қандай қабул қилинади, уларнинг мамлакат ичида ҳаракатланиши қандай ташкил этилади, деган саволларга аниқ жавоб бўлиши керак. Белгиланадиган меъёрлар содда, лекин касалликнинг олдини олиш учун етарли бўлиши лозим. Мисол учун, битта ҳолат аниқланса, бутун меҳмонхонани карантинга олишга зарурат бўлмайдиган тизим ишлаб чиқиш зарур», — деган Шавкат Мирзиёев.