Qashqadaryo viloyatining Kitob tumanida yashovchi Hamza Qosimov MIB xodimining mas’uliyatsizligi sabab Rossiya davlatiga ketish uchun sotib olgan biletiga kuygan. Bu haqda 26-may kuni Qashqadaryo hokimi Zoir Mirzayev rahbarligida o‘tkazilgan yig‘ilishda ma’lum qilingan.
“Pandemiya davrida aholi murojaatlarini hech bir tashkilot rahbari tinglamay qo‘ydi, — dedi viloyat hokimi. — Shu sababli Xalq qabulxonalari orqali murojaatlar ko‘paydi. Ammo unga ham javob berishda yolg‘on-yashiq va’dalar berishdan charchamadik. Muammoni yozib chiqadigan fuqaroga dushmanga qaragandek qarashni yo‘qotaylik”.
Ma’lum bo‘lishicha, Kitob tumanining “Xo‘ja ilm koni” mahallasida yashovchi fuqaro Hamza Qosimov 2020-yil 13-mart kuni Kitob shahridagi aviakassadan Samarqand—Moskva—Xabarovsk yo‘nalishiga 2 million 850 ming so‘mga aviachipta sotib olgan. Ammo aeroportga borganida unga xorijga chiqish uchun taqiq qo‘yilganligi aytilib, mamlakatdan chiqarilmagan.
Fuqaro taqiq sababini bilish uchun Kitob tuman MIBga murojaat qilganda MIB xodimlari taqiq qo‘yilganligini bilmasligini, bu masalani boshqarma orqali tekshirish mumkinligini bildirgan. MIB viloyat boshqarmasi boshlig‘i o‘rinbosari A.Payziyev imzosi bilan yuborilgan javob xatida esa fuqaroga 2011-yil 13-iyundagi sud qaroriga ko‘ra, mamlakat hududidan chetga chiqishga taqiq qo‘yilganligi, ammo ko‘p o‘tmay bekor bo‘lganligi bildirilgan.
Boshqarmaning qo‘shimcha qilishicha, fuqaroga qo‘yilgan taqiqni olish uchun 2020-yil 24-mart kuni mas’ul tashkilotlarga xat yuborilgan.
Zoir Mirzayev yig‘ilishda bu holatni tanqid qilib, “Sud hujjatlari va boshqa organlar hujjatlarini ijro etish to‘g‘risida”gi qonunga ko‘ra, qarzdor jismoniy shaxsning chetga chiqishini vaqtincha cheklashga asos bo‘lgan ijro hujjatining talablari amalda ijro etilganda yoxud u bo‘yicha ijro ishi yuritish ushbu qonunda belgilangan asoslarga ko‘ra tugatilganda yoki tamomlanganda, davlat ijrochisi keyingi kundan kechiktirmasdan qarzdor jismoniy shaxsni, ichki ishlar organlarini va Davlat chegarasini qo‘riqlash organlarini qarzdor jismoniy shaxsning chetga chiqishini cheklash olib tashlanganligi to‘g‘risida yozma yoki elektron shaklda xabardor qilishi lozimligi belgilanganini eslatgan.
Viloyat hokimining qo‘shimcha qilishicha, ushbu ish bo‘yicha Kitob MIB bo‘limi ma’sul xodimlariga nisbatan jazo qo‘llanilmagan.
“Holbuki, qo‘yilgan taqiq vaqtida olib tashlanmagani sabab fuqaro moddiy zarar ko‘rgan va pul mablag‘lari qaytarilmagan. Bu esa fuqaroning haqli e’tiroziga sabab bo‘lmoqda”, — degan viloyat rahbari.
Izoh (0)