«Ўзбекнефтгаз» томонидан ташкил этилган ишчи гуруҳ «Тахиатош нефть базаси» МЧЖга қарашли Элликқалъа филиалининг 51-сонли «Чайка» ва 25-сонли «Қирққиз» фермерларга ёқилғи тарқатиш шохобчаларида (ФЁТШ) ўрганиш ишларини олиб борди ҳамда нефть маҳсулотларининг камомадини аниқлади. Бу ҳақда «Дарё»га «Ўзбекнефтгаз» томонидан маълум қилинди.
Олиб борилган ички текширув натижасида филиалнинг 51-сонли «Чайка» ва 25-сонли «Қирққиз» ФЁТШларида 2020 йил 1 май ҳолатига кўра жами 112,4 миллион сўмлик 15 719 литр нефть маҳсулоти камомади мавжудлиги аниқланди.
Ўрганиш жараёнида мазкур ФЁТШларда сақланаётган нефть маҳсулотларининг тўлиқ сақланиши инвентаризациядан ўтказилди ва натижада «Чайка» ФЁТШда SAE-140 мойидан 485 минг сўмлик 117 литр камомад аниқланди.
2020 йил 15 май ҳолатидаги нефть маҳсулотлари қолдиғини инвентаризациядан ўтказиш вақтида 51-сонли ФЁТШда дизель ёнилғисининг ҳақиқий қолдиғи 6177 литрни ташкил қилган бўлиб, бухгалтерия ҳисоби қолдиғига нисбатан 10 862 литр камомад мавжудлиги аниқланган.
Шунингдек, 25-сонли ФЁТШда дизель ёнилғисининг ҳақиқий қолдиғи 3212 литрни ташкил қилган бўлиб, бухгалтерия ҳисоби қолдиғига нисбатан 4299 литр камомад мавжудлиги маълум бўлди.
Аниқланишича, ушбу камомаднинг келиб чиқишига ФЁТШнинг катта оператори томонидан фермер хўжаликларига дизель ёнилғисини тегишли ҳужжатларни умуман расмийлаштирмасдан, нефть маҳсулотларини истеъмолчиларга тарқатиш ведомостига дизель ёнилғисини олганлигини тасдиқловчи имзосини қўйдирмасдан бериб юборганлиги сабаб бўлган.
Ўрганиш якуни бўйича маълум бўлган нефть маҳсулотларининг камомади юзасидан расмийлаштирилган ҳужжатлар қонунда белгиланган тартибда кўриб чиқиш учун прокуратура органларига тақдим этилди.
Изоҳ (0)