Молия вазирлиги: Энергетика вазирлиги нефть маҳсулотларини импорт қилиш бўйича акциз солиғи ставкаларини қайта кўриб чиқиш бўйича таклиф киритмаган

Молия вазилриги бугунги кунда ишлаб чиқарилган нефть маҳсулотлари ва импорт бўйича акциз солиғи ставкалари бир-биридан фарқ қилишини маълум қилди.

Вазирлик изоҳига кўра, агар Аи-92 русумли 1 тонна бензин ишлаб чиқарувчилар 250 миллион сўм акциз солиғини тўласа, импорт қилувчилар ушбу бензин маркасининг божхона қийматининг 5 фоизи миқдорида акциз солиғини тўлайди, бу эса 1 тонна импорт бензини 240 АҚШ доллари қийматида 121 500 сўмни ташкил этади.

Молия вазирлигининг қайд этишича, 2020 йил бошида импорт ва мамлакат ичида тўланган акциз солиғи миқдори бир хил бўлган.

Манфаатдор вазирлик ва идоралар билан биргаликда акциз солиғи ставкаларини бир хиллаштириш ишлари доирасида импорт ва нефть маҳсулотлари ишлаб чиқаришда акциз солиғининг ягона ставкасини белгилаш масалалари ишлаб чиқилмоқда.

Энергетика вазирлиги нефть маҳсулотларини импорт қилиш бўйича акциз солиғи ставкаларини қайта кўриб чиқиш бўйича Молия вазирлигига таклифларни киритмади, дейилган вазирлик ахборот хизматининг хабарида.

Аввал «Ўзбекнефтгаз» компанияси бензин импортига акциз солиғини 5 фоиздан 20 фоизга оширишни таклиф қилгани, мазкур ставкаларга кўра, битумдан олинадиган нефть ва нефть маҳсулотларига акциз солиғини 5 фоиздан 0 фоизгача камайтириш режалаштирилгани, аммо Аи-80, Аи-91, Аи-92 бензинларига акциз солиғини 5 фоиздан 20 фоизгача кўтариш таклиф этилаётгани, «Жет А-1» маркали газ трубина двигателлари ва «Ц-1» реактив двигателлари учун авиаёқилғи ставкалари ҳам ошиши мумкинлиги хабар қилинганди.

«Ўзбекнефтгаз» 2020 йил 29 апрелдан бошлаб Аи-92 маркадаги бензин нархини 500 сўмга арзонлаштириб, 5500 сўм қилиб белгилаган. 3 майдан бошлаб эса Аи-80 бензини ҳам 500-600 сўмга пасайиб, 3900-4000 сўмдан сотиш йўлга қўйилган.