Соғлиқни сақлаш вазирлиги Ўзбекистонда охирги 14 кун давомида карантинга олинганларнинг умумий сони ва улар орасида қанча касалланган беморлар аниқланганини маълум қилди.
«Сўнгги 14 кун ичида 17 та чартер рейс билан олиб келинган 4056 нафар, чегара ўтказиш постлари орқали Ўзбекистонга кириб келган 11 216 нафар ҳамда мулоқотда бўлганлар билан биргаликда ҳисобланганда жами 20 035 нафаро фуқаро стационар карантинга олинган. Шу даврда мамлакатимизда 734 нафар фуқарода коронавирус инфекцияси аниқланган бўлса, шундан 283 нафари Тошкент вилоятининг Юқори Чирчиқ туманидаги карантин марказига жойлаштирилган фуқаролар орасида тасдиқланди», — дейди вазирлик бошқарма бошлиғи Баҳромжон Эгамбердиев.
Таҳлилларга кўра, хориждан чартер рейслар билан олиб келинганлар орасида энг кўп касалланганлар 14 май куни Санкт-Петербург шаҳридан олиб келинган фуқароларда аниқланиб, 86 нафарни ташкил этган.
Чегара ўтказиш постлари орқали кириб келганлар орасида энг кўп касалланиш ҳолати эса Қозоғистондан «Ғишткўприк» чегара пости орқали кириб келган фуқаролар орасида аниқланган. Уларнинг сони 99 нафарни ташкил этди.
«Хориждан чартер рейслари билан олиб келинаётган, чегара ўтказиш постлари орқали Ўзбекистонга кириб келаётган, шунингдек, касалланганлар билан мулоқотда бўлган барча фуқаролар санитария-эпидемиологик талабларга қатъий риоя этилган ҳолда карантин муассасаларига жойлаштирилмоқда. Улар шахсий гигиеник ва бир марталик воситалар билан таъминланиб, мунтазам тиббий кузатувга олинади. Айни пайтда давлат бюджетидан стационар шароитда тиббий кузатувда бўлган ҳар бир фуқаронинг бир куни учун ўртача 153 минг 700 сўм сарфланмоқда. 14 кунлик карантин кузатуви муддати давомида касаллик аниқланмаган ва карантин муассасасида касалланганлар билан мулоқотда бўлмаган фуқаролар махсус ажратилган транспорт воситаларида ўз манзилларига етказиб қўйилмоқда. Умуман олганда, стационар карантинга олишдан тортиб, карантин муддати тугагач, фуқароларни ўз уйларига етказиб қўйишгача бўлган барча харажатлар давлат бюджетидан тўлиқ қопланмоқда», — деган вазирлик расмийси.
Стационар ва уй карантинига олиш тадбирлари бошланган илк кунлардан айни пайтга қадар карантинга олинган жами 394 181 нафар фуқародан 348 292 нафари карантиндан чиқарилган. Шундан, уй карантинига олинган 305 044 нафар фуқародан 280 006 нафари чиқарилган. Стационар карантинга олинган 89 137 нафар фуқародан эса 68 286 нафари чиқарилган.
Ўзбекистонда ҳозиргача коронавирус инфекциясига чалинган 2636 нафар фуқаро бутунлай соғайган. Аввалроқ даволанишда бўлганлардан 2 нафарининг аҳволи оғирлиги, 1 нафарининг аҳволи эса ўта оғир эканлиги хабар қилинган.
Ўзбекистонда Жиззах, Қашқадарё, Фарғона, Сурхондарё, Бухоро ҳамда Хоразм вилоятлари COVID-19’дан холи ҳудудларга айланган.
Эслатиб ўтамиз, Ўзбекистонда 13 нафар бемор коронавирус инфекцияси асоратлари оқибатида вафот этган.
Изоҳ (0)