Sog‘liqni saqlash vazirligi O‘zbekistonda oxirgi 14 kun davomida karantinga olinganlarning umumiy soni va ular orasida qancha kasallangan bemorlar aniqlanganini ma’lum qildi.
“So‘nggi 14 kun ichida 17 ta charter reys bilan olib kelingan 4056 nafar, chegara o‘tkazish postlari orqali O‘zbekistonga kirib kelgan 11 216 nafar hamda muloqotda bo‘lganlar bilan birgalikda hisoblanganda jami 20 035 nafaro fuqaro statsionar karantinga olingan. Shu davrda mamlakatimizda 734 nafar fuqaroda koronavirus infeksiyasi aniqlangan bo‘lsa, shundan 283 nafari Toshkent viloyatining Yuqori Chirchiq tumanidagi karantin markaziga joylashtirilgan fuqarolar orasida tasdiqlandi”, — deydi vazirlik boshqarma boshlig‘i Bahromjon Egamberdiyev.
Tahlillarga ko‘ra, xorijdan charter reyslar bilan olib kelinganlar orasida eng ko‘p kasallanganlar 14-may kuni Sankt-Peterburg shahridan olib kelingan fuqarolarda aniqlanib, 86 nafarni tashkil etgan.
Chegara o‘tkazish postlari orqali kirib kelganlar orasida eng ko‘p kasallanish holati esa Qozog‘istondan “G‘ishtko‘prik” chegara posti orqali kirib kelgan fuqarolar orasida aniqlangan. Ularning soni 99 nafarni tashkil etdi.
“Xorijdan charter reyslari bilan olib kelinayotgan, chegara o‘tkazish postlari orqali O‘zbekistonga kirib kelayotgan, shuningdek, kasallanganlar bilan muloqotda bo‘lgan barcha fuqarolar sanitariya-epidemiologik talablarga qat’iy rioya etilgan holda karantin muassasalariga joylashtirilmoqda. Ular shaxsiy gigiyenik va bir martalik vositalar bilan ta’minlanib, muntazam tibbiy kuzatuvga olinadi. Ayni paytda davlat budjetidan statsionar sharoitda tibbiy kuzatuvda bo‘lgan har bir fuqaroning bir kuni uchun o‘rtacha 153 ming 700 so‘m sarflanmoqda. 14 kunlik karantin kuzatuvi muddati davomida kasallik aniqlanmagan va karantin muassasasida kasallanganlar bilan muloqotda bo‘lmagan fuqarolar maxsus ajratilgan transport vositalarida o‘z manzillariga yetkazib qo‘yilmoqda. Umuman olganda, statsionar karantinga olishdan tortib, karantin muddati tugagach, fuqarolarni o‘z uylariga yetkazib qo‘yishgacha bo‘lgan barcha xarajatlar davlat budjetidan to‘liq qoplanmoqda”, — degan vazirlik rasmiysi.
Statsionar va uy karantiniga olish tadbirlari boshlangan ilk kunlardan ayni paytga qadar karantinga olingan jami 394 181 nafar fuqarodan 348 292 nafari karantindan chiqarilgan. Shundan, uy karantiniga olingan 305 044 nafar fuqarodan 280 006 nafari chiqarilgan. Statsionar karantinga olingan 89 137 nafar fuqarodan esa 68 286 nafari chiqarilgan.
O‘zbekistonda hozirgacha koronavirus infeksiyasiga chalingan 2636 nafar fuqaro butunlay sog‘aygan. Avvalroq davolanishda bo‘lganlardan 2 nafarining ahvoli og‘irligi, 1 nafarining ahvoli esa o‘ta og‘ir ekanligi xabar qilingan.
O‘zbekistonda Jizzax, Qashqadaryo, Farg‘ona, Surxondaryo, Buxoro hamda Xorazm viloyatlari COVID-19’dan xoli hududlarga aylangan.
Eslatib o‘tamiz, O‘zbekistonda 13 nafar bemor koronavirus infeksiyasi asoratlari oqibatida vafot etgan.
Izoh (0)