Йўлда самокатда учиб кетаётган қизни тепиб йиқитгани айтилган навоийлик йигит воқеасига ойдинлик киритилди (видео)

«Йўлда самокатда учиб кетаётган қизни тепиб, йиқитиб яна устидан мағрурланиб кулишгани етмагандек, буни Instagram тармоқларига жойлашибди» изоҳи остида қолдирилган видеолавҳа ижтимоий тармоқларда кенг муҳокамага сабаб бўлди. Навоий шаҳар ИИБнинг хабар беришича, тезкор ходимлар томонидан воқеа жараёни батафсил ўрганилиб, йигитлар шахсига ойдинлик киритилди.

Маълум бўлишича, 2003 йилда туғилган, Навоий шаҳридаги Мирзо Улуғбек кўчасида истиқомат қилувчи Ж. ёнма-ён қўшниси, 2003 йилда туғилган А. исмли қиз билан тенгдошлиги сабабли олдиндан ўзаро ҳазил-ҳузул қилиб, бир-бири билан дўстона муносабатда бўлган.

Бироқ ноўрин ва меъёрдан ошган ҳазилнинг охири хунук кўнгилсизлик билан тугаган. Ж. танишлари — 1998 йилда туғилган Ш. ҳамда 1999 йилда туғилган Р. билан кўчада сайр қилиб юрган вақтда дўстларига ўзини кўз-кўз этиш мақсадида А.нинг самокатда келаётганидан фойдаланиб, йўлтўсарлик қилган ҳамда ҳазил тариқасида оёқ кўтарганида зарба тегмасада А. қўрқув остида самокатдан йиқилган.

Пайтдан фойдаланган Р. ушбу жараённи тасвирга олиб, ижтимоий тармоқлар орқали кенг жамоатчиликка тарқалишида сабабчи бўлган. Навоий вилоят суд тиббиёт экспертиза хулосасига кўра, А.нинг йиқилиши оқибатида чап оёғининг тизза қисмига 1,5х1 сантиметр ҳажмда терисига енгил шикаст етказилган.

Маъмурий ишлар бўйича Навоий шаҳар суди қарорига кўра, қоидабузар Ш. ҳамда Р. Маъмурий жавобгарлик тўғрисидаги кодекснинг 183-моддасидаги (Майда безорилик) ҳуқуқбузарликни содир этганликда айбли деб топилиб, энг кам иш ҳақининг 5 баравари миқдорида жарима жазоси тайинланган.

Ж.нинг вояга етмаганлиги инобатга олиниб, отаси М.га нисбатан Маъмурий жавобгарлик тўғрисидаги кодекснинг 47-моддаси (Болаларни тарбиялаш ва уларга таълим бериш борасидаги мажбуриятларни бажармаслик)га кўра, вояга етмаган фарзанд тарбиясида бефарқлиги инобатга олиниб, энг кам иш ҳақининг 5 баравари миқдорида жарима жазоси тайинланган.