2020 йил январь—апрель ойлари якуни бўйича Ўзбекистоннинг ташқи савдо айланмаси (ТСА) 10,8 миллиард АҚШ долларини ташкил этиб, 2019 йилнинг мос даврига нисбатан 1,2 миллиард долларга ёки 10,7 фоизга камайди. Бу ҳақда Давлат статистика қўмитаси томонидан тақдим этилган маълумотларда келтирилган.
Таъкидланишича, ТСАда экспорт ҳажми 4,4 миллиард АҚШ долларига (10,6 фоизга камайди) ва импорт ҳажми 6,4 миллиард долларга етган (10,8 фоизга камайди). Ҳисобот даврида 1,9 миллиард доллар қийматида пассив ташқи савдо баланси қайд этилган.
Ўзбекистон, жаҳоннинг 150 дан ортиқ мамлакатлари билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссаси Россияда (16,7 фоиз), Хитойда (16,6 фоиз), Қозоғистонда (8,3 фоиз), Жанубий Корея (7,4 фоиз), Туркия (5,6 фоиз), Қирғизистон (2,0 фоиз) ва Германияда (2,0 фоиз) қайд этилган.
Ташқи иқтисодий фаолият бўйича 20 та йирик ҳамкор-давлатлар орасидан олтита давлатда фаол ташқи савдо баланси кузатилган, хусусан, Афғонистон (213,7 миллион доллар), Қирғизистон (138,8 миллион доллар), Тожикистон (93,7 миллион доллар), Туркия (42,8 миллион доллар), Франция (23,6 миллион доллар) ва Эрон (8 миллион доллар) шулар жумласидандир. Қолган 14 та давлат билан пассив ташқи савдо баланси сақланиб қолмоқда.
2020 йил январь—апрель ойларида, ташқи савдо айланмасида МДҲ давлатларининг улуши 35,1 фоизни ташкил этиб, ташқи савдо айланмасидаги 2018 йилга нисбатан улуши 3,1 фоизга ошган.
Эслатиб ўтамиз, 2020 йилнинг биринчи чорагида Ўзбекистоннинг ташқи савдо айланмаси 8,14 миллиард долларни ташкил қилганди.
Изоҳ (0)