Сардоба фалокатидан сўнг эвакуация қилинганларнинг 22 минг нафари ҳали ҳам ўз уйларига қайтмаган

Сирдарёдаги сув тошқини сабаб Сардоба, Оқолтин ва Мирзаобод туманларидан эвакуация қилинган жами 89 минг 450 нафар аҳолининг 66 минг 580 нафари ёки 74,4 фоизи яшаш манзилига қайтарилган. 22 минг 870 нафар фуқаро эвакуация қилинган ҳудудларда қолмоқда.

Бу ҳақда АОКА ҳузуридаги брифингда Ички ишлар вазири матбуот котиби Шоҳрух Ғиёсов маълум қилди.

Ички ишлар вазири матбуот котиби сув тошқинидан талафот кўрган ҳудудларда ўтказилаётган хатлов тадбири давомида жами 3 448 нафар фуқаронинг фуқаролик паспортлари йўқлиги аниқлангани, шундан 1116 нафар фуқаронинг паспортлари топилиб, ўз эгаларига қайтарилганини ҳам айтди. 1349 нафар фуқарога янги биометрик паспортлар расмийлаштирилган, 983 нафар шахсга фуқаролик паспортлари расмийлаштирилиш жараёнида. Уларнинг паспорт олишлари учун маблағлар давлат ҳисобидан қоплаб берилиши режалаштирилгани билдирилди.Шунингдек, олиб борилган тадбирларда 258 нафар фуқаронинг транспортга оид техник ҳужжатлари талафот натижасида йўқолганлиги маълум қилинди. 100 нафар фуқаронинг ҳайдовчилик гувоҳномалари топилиб ўз эгаларига қайтарилган. Қолган 158 нафар фуқарога тегишли транспорт ҳужжатларини расмийлаштириш чоралари кўрилаётгани таъкидланди. Хусусан, ҳайдовчилик гувоҳномалари мудофаага кўмаклашувчи «Ватанпарвар» ўқув спорт техник клублари базасидан текширилиб қисқа вақт ичида қайта тиклаб берилаётгани қўшимча қилинди.

Эслатиб ўтамиз, аввалроқ Давлат хизматлари агентлиги Сардоба сув омборида рўй берган авария сабаб эвакуация қилинган кўплаб фуқароларнинг йўқолган ҳужжатлари дубликатларини топшираётгани маълум қилинганди.