Сирдарёда сув тошқинидан зарар кўрган ҳудудларда ички ишлар органлари томонидан кеча-ю кундуз олиб борилган профилактик чора-тадбирлар натижасида бирорта ҳам жиноят содир этилишига йўл қўйилмади. Бу ҳақда Ички ишлар вазирлиги матбуот котиби Шоҳрух Ғиёсов АОКАда ташкил этилган брифингда маълум қилди.
Талафот етган ҳудудларда ҳуқуқбузарлик содир этилишининг олдини олиш мақсадида ички ишлар органлари томонидан 309 нафар муқаддам судланган ҳамда 106 нафар профилактик ҳисобда турган шахслар билан профилактик ишлари амалга оширилган.
Эвакуация сабаб бўш қолган ҳудудлар муҳофазаси учун ички ишлар органлари вакилларидан иборат 35 та пиёда ва 25 та автопатруль, 15 та жойда тўсиқ постлар ташкил этилган. 74 дона ов қуролига эга фуқаронинг хонадонидан қуроллар тегишли тартибда расмийлаштирилиб, сақлаш учун ИИБга топширилган.
Ғиёсов ижтимоий тармоқларда зарар кўрган ҳудудларда ўғирлик жиноятлари қайд этилаётганлиги тўғрисида тарқалган маълумотлар ноўрин ва асоссиз эканлигини ҳам қўшимча қилди.
Талафот пайтидаги дастлабки саросимада фуқаролар қўшниси ёки маҳалладошининг қаровсиз ёки сув остида қолиб кетиши хавфи бўлган уй ҳайвонларини ўзларига тегишли юк автомашиналарида хавфсиз ҳудудга кўчиргани ва улар сақланаётган жойлар тўғрисида маҳалла идоралари ҳамда ҳуқуқ-тартибот органларига маълумот бергани қайд этилди.
Мавзуга доир:
Изоҳ (0)