Монополияга қарши курашиш қўмитаси ҳузуридаги Истеъмолчиларнинг ҳуқуқларини ҳимоя қилиш агентлиги Beeline Узбекистан мобил оператори томонидан «Ғолиб бўл ва ютиб ол!» акцияси бўйича сохта реклама орқали истеъмолчиларга нотўғри маълумот берганлиги учун «ViaMobi» МЧЖга қарши иш қўзғатди. Бу ҳақда агентлик матбуот хизмати хабар берди.
Маълум бўлишича, абонентларга «Сизнинг телефон рақамингиз 100 000 000 сўмлик супер ютуқнинг соҳиби сифатида танланди! SMS орқали 3 сонини 6767 га юборинг! Хизматга обуна бўлиш нархи кунига 1999 сўм» мазмундаги SMS-хабар юборилган.
«ViaMobi» мазкур акцияда иштирок этишга эътиборни жалб қилиш учун танланган абонентлар гуруҳига SMS-хабар юборилганлигини тан олган. Бироқ матнни мослаштириш (таржима қилиш) жараёнидаги хато туфайли SMS-хабарларнинг маъноси ўзгариб кетган.
Оқибатда «Сиз ғолиб бўлишингиз мумкин» ўрнига «Сизнинг телефон рақамингиз 100 000 000 сўмлик супер ютуқнинг соҳиби сифатида танланди» деган SMS юборилган.
Ушбу реклама акциясида 749 минг истеъмолчи иштирок этган бўлиб, компания ундан 1 миллиард сўм даромад олган.
Шу муносабат билан «ViaMobi» МЧЖ томонидан тақдим этилган реклама берувчига нисбатан «Истеъмолчилар ҳуқуқларини ҳимоя қилиш тўғрисида» ва «Реклама тўғрисида»ги қонунларни бузганлик учун иш қўзғатилган.
« ‘Истеъмолчилар ҳуқуқларини ҳимоя қилиш тўғрисидаъги қонунга кўра, нотўғри реклама оқибатида сотиб олинган товар (иш, хизмат) туфайли истеъмолчига етказилган зарар ишлаб чиқарувчи (ижрочи, сотувчи) томонидан тўлиқ ҳажмда қопланиши лозим», — дейилади хабарда.
Шунингдек, ушбу акция иштирокчилари нотўғри реклама натижасида етказилган зарар қопланиши юзасидан агентлик ва «ViaMobi» МЧЖга мурожаат қилишлари лозимлиги таъкидланган.
Изоҳ (0)