Қирғизистон президенти Сўронбой Жээнбеков Евросиё иқтисодий иттифоқининг олий иқтисодий кенгашида айрим мамлакатларнинг коронавирус пандемияси сабаб назоратни кучайтириб, маҳсулотлар етказиб беришда чекловлар қўйиб олганини таъкидлади. Бу ҳақда «РИА Новости» хабар қилган.

Фото: «РИА Новости»

Евросиё иқтисодий иттифоқи – халқаро интеграциялашган иқтисодий бирлашма, ташкилот 2015 йил 1 январда тузилган. Иттифоққа Россия, Арманистон, Беларусь, Қозоғистон ва Қирғизистон аъзо ҳисобланади.

Қирғизистон раҳбари ЕОИИ ҳудудида товарларнинг эркин ҳаракатланиши COVID-19 коронавирус пандемияси даврида ташкилотга аъзо мамлакатларда савдо-сотиқ хавфсизлигини таъминлайди.

«Айрим давлатлар назоратни кучайтириб, маҳсулот етказиб беришга чекловлар ўрнатган», – деган Жээнбеков.

У гап қайси давлатлар ҳақида кетаётганига аниқлик киритмаган. Аммо бундай ҳолатларга қарши Евросиё иқтисодий комиссияси ваколатларини кенгайтиришни тавсия қилган.

«Евросиё иқтисодий комиссиясининг мамлакатлар ўртасидаги тўсиқларни олиб ташлашдаги ролини кучайтириш зарур, деб ҳисоблаймиз. Мавжуд механизмлар комиссияда ваколатлар йўқлиги сабаб самара бермаяпти. Шунингдек, комиссия аъзоларининг масъулиятини ҳам ошириш лозим», — деган Жээнбеков.