Ўзбекистон ҳукумати хорижий мамлакатлардан оғир аҳволда қолган яна 12 минг нафар фуқарони қайтариб олиб келиш чораларини кўрмоқда. Бу ҳақда Президент Шавкат Мирзиёев 19 май, сешанба куни бўлиб ўтган видеоселектор йиғилишида маълум қилди.
Йиғилишда касалликни юқтирган 2802 нафар фуқародан 2314 нафари ёки 82 фоизи бутунлай соғайгани қайд этиб ўтилган. 23 минг нафар тиббиёт ходимига эса жами 78 миллиард сўмдан зиёд рағбатлантириш пули тўлаб берилган.
«Касалликка қарши курашиш билан бирга, чет эллардаги фуқароларимиз ҳақида ҳам қайғуряпмиз. Ҳозирги кунгача хориждан 39 минг нафар юртдошимизни олиб келдик. Ташқарида оғир аҳволда қолган яна 12 минг нафар фуқаромизга тегишли ёрдам кўрсатиб, уларни юртимизга олиб келиш чоралари кўрилмоқда», — деб маълум қилган Шавкат Мирзиёев.
Шавкат Мирзиёев 7 май куни бўлиб ўтган йиғилишда бошқа мамлакатдан 11 минг нафар фуқарони қайтариш режалаштирилаётганини маълум қилган эди. 8—10 май кунлари Дубай (БАА), Минск (Беларусь), Сеул (Жанубий Корея) ва Деҳли (Ҳиндистон)дан амалга оширилган чартер рейслар орқали 800 дан ортиқ ватандош мамлакатга қайтди. Uzbekistan Airways авиакомпанияси 24 майга қадар амалга ошириладиган чартер рейслар жадвалини эълон қилган эди.
Бундан ташқари, Россия—Қозоғистон чегарасида тўпланган 1100 нафар ватандош Президент топшириғига асосан 18—19 май кунлари автобусларда Ўзбекистонга олиб кетилди.
Ўзбекистоннинг Москвадаги элчихонаси Россияда карантин чекловлари шароитида бўлиб турган 65 мингга яқин фуқаро ватанга қайтиш бўйича онлайн ариза топширганини маълум қилган эди.
Изоҳ (0)