Президентнинг «Аҳоли томорқаларидан фойдаланиш самарадорлигини оширишнинг қўшимча чора-тадбирлари тўғрисида»ги қарори лойиҳаси муҳокама учун жойлаштирилди.
Ҳужжат лойиҳасига кўра, ҳар бир туманни комплекс ижтимоий-иқтисодий ривожлантириш бўйича секторлари ҳудудида камида биттадан «Томорқа хизмати» МЧЖлар ташкил этилади. Мазкур МЧЖларга иссиқхона, совутгичли омборхоналар, чорвачилик мажмуалари қуриш учун камида 3 гектардан ер ажратиш белгиланган.
Шунингдек, улар учун вилоят ва туман (шаҳар) марказий деҳқон бозорларида, аҳоли гавжум пунктларида махсус савдо майдонларини ажратиш кўзда тутилмоқда.
Қайд этилишича, деҳқон хўжалиги ва томорқа ер эгалари, «Томорқа хизмати» МЧЖ ва қишлоқ хўжалиги кооперативларига Фермер, деҳқон хўжалиги ва томорқа ер эгаларини қўллаб-қувватлаш жамғармалари ҳисобидан Марказий банкнинг асосий ставкасида ва ундан юқори ажратиладиган кредитлар фоиз ставкасининг 50 фоизини қоплаб бериш тизими жорий қилинади.
Сув таъминоти оғир ҳудудлардаги аҳоли томорқалари, деҳқон хўжаликлари ҳамда қишлоқ хўжалигида фойдаланилмаётган ер майдонларини суғориш учун артезиан қудуқларини қазиш, дарёлар, каналлар ва бошқа сув ҳавзаларидан сув чиқариш воситаларини сотиб олиш ва ўрнатиш учун давлат бюджети ҳисобидан субсидия ажратилади.
Бундан ташқари, «Томорқа хизмати» МЧЖ ва қишлоқ хўжалиги кооперативлари давлат рўйхатидан ўтган кундан бошлаб ушбу қарорга мувофиқ уларнинг асосий фаолияти доирасида 5 йил муддатга қўшилган қиймат солиғидан ташқари барча турдаги солиқлардан озод этилиши мумкин.
Қарор лойиҳаси муҳокамаси 29 майгача давом этади. Унинг тўқли матни билан қуйидаги ҳавола орқали танишиш мумкин.
Изоҳ (0)