Ўзбекистон парламентида давлат компаниялари раҳбарларининг ҳисоботини тинглаш тартиби жорий қилинади

Олий Мажлис Қонунчилик палатаси томонидан 19 май куни «Олий Мажлиси Қонунчилик палатасининг Регламенти тўғрисида»ги, «Олий Мажлис Сенатининг Регламенти тўғрисида»ги ҳамда «Парламент назорати тўғрисида»ги қонунларга ўзгартиришлар киритилди. Бу ҳақда Қонунчилик палатаси депутати ва «Юксалиш» умумиллий ҳаракати раиси Акмал Бурҳонов маълум қилди.

Ўзгартиришларга кўра, Қонунчилик палатаси ва Сенатга ўзининг мажлисида давлат органлари, хўжалик бошқаруви органлари раҳбарларининг ўз фаолиятига доир масалалар юзасидан ахборотини эшитиши мумкинлиги белгиланмоқда.

Ҳозиргача парламент аъзолари Қонунчилик палатаси ва Сенат мажлисларида фақатгина ҳукумат аъзолари, ҳисоб палатаси, бош прокурор ва Марказий банк бошқаруви раисининг ҳисоботини эшитиш ҳуқуқига эга эди.

Ушбу ўзгартиришлар кучга кирса, парламент аъзолари юқоридаги идоралар билан бир қаторда хўжалик бошқаруви органлари, масалан, Uzbekistan Airways ёки Навоий кон-металлургия комбинати раҳбарларининг ҳам ахборотларини эшитиш имкониятига эга бўлади.

Аввалроқ Қонунчилик палатасининг 19 май куни ўтказилган йиғилишида Ўзбекистоннинг янги таҳрирдаги «Таълим тўғрисида»ги қонуни лойиҳаси ҳам маъқуллангани ҳақида хабар берилганди.

Эслатиб ўтамиз, Сенатнинг 11 май куни чақирилган тўртинчи ялпи мажлисида «Илм, маърифат ва рақамли иқтисодиётни ривожлантириш йили» давлат дастурининг 2020 йил биринчи чорагидаги ижроси юзасидан Вазирлар Маҳкамасининг, Омбудсман, ҳисоб палатаси, бош прокурор ва Марказий банк бошқаруви раисининг 2019 йилдаги фаолияти тўғрисидаги ҳисоботлари эшитилганди.