Ўзбекистонда ўзини ўзи банд қилган фуқароларни даромад солиғидан озод қилиш режалаштирилмоқда. Бу ҳақда Президент Шавкат Мирзиёев раислигида 19 май, сешанба куни бўлиб ўтган видеоселектор йиғилишида маълум қилинди.
Президент матбуот хизматининг хабар беришича, йиғилишда ўзини ўзи банд қилаётган, қўлида касб-ҳунари бор одамларга муносиб шароит яратиш мақсадида янги тизим жорий этилиши белгиланган.
«Яъни сартарош, этикдўз, новвой, темирчи, дурадгор, тикувчи, таксист, таржимон, дизайнер, компьютер дастурчиси каби ўзини ўзи банд қилган 60 дан зиёд касб эгалари даромад солиғидан озод қилинади», — дейилади расмий ахборотда.
Мазкур имтиёздан фойдаланиш учун телефон орқали солиқ идораларини хабардор қилиш кифоя бўлади. Хорижий тажриба асосида бундай фуқароларни рўйхатга олиш ва ҳисобини юритиш бўйича мобил илова ишлаб чиқилиши кўзда тутилган.
Ўзини ўзи банд қилган аҳолини даромад солиғидан озод қилиш бўйича чоралар қисқа фурсатда янги иш ўринлари яратиш учун кичик бизнес ва оилавий тадбиркорликни қўллаб-қувватлаш ниятида кўрилмоқда. Ҳукумат пандемия туфайли Ўзбекистонда камбағал аҳоли ва ишсизлар сонининг ошиши, оилалар даромадининг камайишини прогноз қилмоқда.
Аввалроқ Президент Шавкат Мирзиёев 19 май куни бўлиб ўтган видеоселектор йиғилишида тадбиркорларнинг мулкини ноқонуний олиб қўйган ҳокимлар биргина ишдан ҳайдалиш билан чекланмаслигини таъкидлагани, шунингдек, айрим туман ва шаҳар ҳокимларини ишдан олиш ҳақида кўрсатма бергани ҳақида хабар берилган эди.
Изоҳ (0)